Xalq deputatlari Toshkent shahar Kengashi deputatlari “Hududgaz Poytaxt” gaz ta’minoti filialiga tashrif buyurdilar

Bugun Xalq deputatlari Toshkent shahar Kengashi deputatlari “Hududgaz Poytaxt” gaz ta’minoti filialiga tashrif buyurib, korxonaning 2026–2027-yillar kuz-qish mavsumiga tayyorgarlik jarayonlari bilan yaqindan tanishdilar.

Tashrif davomida tabiiy gaz ta’minoti barqarorligini ta’minlash maqsadida amalga oshirilayotgan ishlar, jumladan, moddiy-texnik zaxira bazalari, maxsus texnika va asbob-uskunalar, zamonaviy mobil laboratoriya avtomashinasi, quyosh panellari bilan jihozlangan yangi zamonaviy gaz taqsimlash punkti hamda avariya-dispetcherlik xizmati faoliyati atroflicha o‘rganildi.

Shuningdek, mas’ullar tomonidan kuz-qish mavsumida iste’molchilarni tabiiy gaz bilan uzluksiz va xavfsiz ta’minlash, yuzaga kelishi mumkin bo‘lgan nosozliklarni tezkor bartaraf etish hamda avariya holatlarining oldini olish borasida amalga oshirilayotgan chora-tadbirlar yuzasidan ma’lumot berildi.

O‘rganish jarayonida deputatlar tomonidan soha faoliyatini yanada takomillashtirish, mavjud muammolarni bartaraf etish va kuz-qish mavsumini betalafot o‘tkazishga qaratilgan taklif hamda mulohazalar bildirildi.

Mazkur tashrif kuz-qish mavsumiga tayyorgarlik ishlarini har tomonlama o‘rganish, tabiiy gaz ta’minoti barqarorligini mustahkamlash hamda iste’molchilarga sifatli, xavfsiz va uzluksiz xizmat ko‘rsatish samaradorligini oshirishga qaratildi.

“Hududgaz Poytaxt” GTF Matbuot xizmati