Душанбе: имзои ду санади ёддошти тафоҳум оид ба ҳамкорӣ дар соҳаи сайёҳӣ ва хизматрасонӣ

Дар доираи Форуми байналмилалии "Сайёҳии устувор ва мероси фарҳангӣ" маросими ба имзо расонидани ду ёддошти тафоҳум оид ба ҳамкорӣ байни муассисаҳои соҳаи сайёҳӣ, хизматрасонӣ ва тарабхонаҳои Тоҷикистон баргузор гардид. Ёддошти тафоҳуми аввал байни Муассисаи давлатии «Маркази ҷумҳуриявии такмили ихтисоси кормандони соҳаҳои сайёҳӣ ва хизматрасонӣ»-и Донишгоҳи байналмилалии сайёҳӣ ва соҳибкории Тоҷикистон ва Донишкадаи рушди менеҷменти Сингапур дар шаҳри Душанбе ба имзо расид.

Ҳуҷҷати мазкур ба таҳкими робитаҳои касбӣ, табодули таҷрибаи байналмилалӣ, рушди фарҳанги муосири хизматрасонӣ ва такмили ихтисоси кормандони соҳа равона шудааст.

Ёддошти тафоҳуми дуюм байни ҳамин муассиса ва Ассотсиатсияи тарабхонаҳои Тоҷикистон ба имзо расид. Ин ҳамкорӣ ба такмили фарҳанги хизматрасонӣ дар тарабхонаҳо, баланд бардоштани сатҳи касбияти кормандон, беҳтар намудани муошират бо муштариён ва ҷорӣ намудани таҷрибаҳои муосири соҳаи меҳмондорӣ мусоидат хоҳад кард. Ин ташаббусҳо барои густариши ҳамкориҳои таълимию касбӣ, табодули таҷриба ва баланд бардоштани сифати хизматрасонӣ дар соҳаи сайёҳӣ ва меҳмондорӣ заминаи мусоид фароҳам меоранд.

📱 Обуна шавед — Ҳамдастӣ
📱Ба Тик Токи мо обуна шавед