Тоҷикистон ва Ҷопон дар Ваҳдат пули нав месозанд

Тоҷикистон ва Ҷопон масъалаи сохтмони пули нав аз болои дарёи Кофарниҳон дар даромадгоҳи шаҳри Ваҳдатро баррасӣ намуданд.
Тавре ки аз Вазорати нақлиёти Ҷумҳурии Тоҷикистон хабар медиҳанд, ин масъала зимни мулоқоти вазири нақлиёт Азим Иброҳим бо сафири Ҷопон дар Тоҷикистон Кейко Фурута дар шаҳри Душанбе баррасӣ гардид.

Зикр шуд, ки дар давоми 25 соли охир бо дастгирии Ҳукумати Ҷопон дар Тоҷикистон 35 лоиҳаи хурду бузург амалӣ гардидааст. Аз ҷумла, 12 лоиҳа тавассути Агентии ҳамкории байналмилалии Ҷопон (JICA) дар самти сохтмону ташхиси техникии роҳу пулҳо, харидории техника ва омӯзиши мутахассисон татбиқ шудаанд.

Пули нав дар километри 19+800-и роҳи автомобилгарди «Душанбе – Кӯлоб – Хоруғ – Қулма» сохта мешавад. Айни замон таҳияи асосноккунии техникию иқтисодии лоиҳа аз ҷониби ширкати муҳандисию машваратии ҷопонии CTII дар марҳилаи анҷомёбӣ қарор дорад.

Ба иттилои манбаъ, пули мавҷуда бинобар маҳдуд будани шумораи хатҳои ҳаракат ва ҳолати техникии худ ба талаботи имрӯза ҷавобгӯ нест. Аз ин рӯ, оғози ҳарчи зудтари корҳои лоиҳакашӣ ва сохтмони пули нав муҳим арзёбӣ мегардад. Ҷониби Ҷопон низ ба татбиқи лоиҳа ҳавасманд буда, омодагии худро барои марҳила ба марҳила амалӣ намудани он баён кардааст.

📱 Обуна шавед — Ҳамдастӣ
📱Ба Тик Токи мо обуна шавед