Дар Брюссел муколамаи зиддитеррористии кишварҳои Осиёи Марказӣ ва ИА баргузор гардид

Иттиҳоди Аврупо ва кишварҳои Осиёи Марказӣ рӯзи 8 октябр дар Брюссел барои баргузории дувумин муколамаи зиддитеррористӣ ҷамъ омада, талошҳои муштараки худро дар самти мубориза бо терроризм ва ифротгароии хушунатомез тақвият доданд, хабар медиҳад намояндагии ИА дар Душанбе.

Намояндагони Иттиҳоди Аврупо, Қазоқистон, Қирғизистон, Тоҷикистон, Туркманистон ва Ӯзбекистон масъалаҳои марбут ба таҳаввули таҳдидҳои террористӣ дар минтақаҳои калидӣ, баррасии таҳдидҳои дохилӣ, иштирок дар ниҳодҳои бисёрҷониба ва стратегияҳои таъқиби ҳуқуқӣ, офиятбахшӣ ва бозгашти ҷангиёни хориҷиро баррасӣ намуданд. Дар ин нишаст, ҳамчунин, масъалаи муқовимат ба таблиғоти хушунатомез дар фазои маҷозӣ ва раванди ифротгарошавӣ мавриди баррасӣ қарор гирифт.

Иттиҳоди Аврупо зарурати риояи волоияти қонун ва ҳуқуқи инсонро дар ҳама чораҳои зиддитеррористӣ таъкид кард, то ки кӯшишҳои амниятӣ самаранок, мутаносиб ва бар асоси ҳуқуқ боқӣ монанд. Иттиҳоди Аврупо аз мубодилаи пурсамар ва пурмазмун истиқбол намуд. Муколама ҳамчун як форуми солона дар соли 2027 идома хоҳад ёфт.

Қабл аз Муколама, коршиносон аз Иттиҳоди Аврупо ва кишварҳои Осиёи Марказӣ рӯзи 7 октябр барои мубодилаи техникӣ оид ба таъқиб, офиятбахшӣ ва ҳамгироии бозгаштагон, мубодилаи таҷрибаҳои беҳтарин ва дарсҳои асосии омӯхташуда ҷамъ омаданд.

📱 Обуна шавед — Ҳамдастӣ
📱Ба Тик Токи мо обуна шавед