Намояндагии Тоҷикистон дар Русия муҳоҷиронро аз хатари сирояти ВНМО (ВИЧ) ҳушдор дод

Намояндагии Вазорати меҳнат, муҳоҷират ва шуғли аҳолии Тоҷикистон дар Федератсияи Русия аз муҳоҷирони тоҷик даъват кардааст, ки ба саломатии худ ва наздиконашон диққати ҷиддӣ диҳанд ва қоидаҳои пешгирӣ аз бемориҳои сироятиро риоя намоянд.
 
Ба иттилои намояндагӣ, яке аз чунин бемориҳо ВНМО (ВИЧ) мебошад, ки ба системаи масунияти инсон осеб мерасонад. Ин вирус асосан тавассути алоқаи ҷинсии бе воситаи муҳофизат, хуни сироятёфта, истифодаи сӯзандоруҳои муштарак ва аз модар ба кӯдак ҳангоми ҳомиладорӣ, таваллуд ё ширдиҳӣ мегузарад.
 
Мутахассисон тавсия медиҳанд, ки муҳоҷирон аз воситаҳои муҳофизат истифода баранд, аз сӯзандоруҳои муштарак худдорӣ кунанд ва ҳангоми эҳтимоли сироят сари вақт аз ташхис гузаранд.
 
Ҳарчанд ВНМО ҳоло пурра табобат намешавад, доруҳои муосир имкон медиҳанд, ки шахси гирифтори вирус умри дарозу солим дошта бошад. Ҳамчунин, дар сурати табобати дуруст ва ба сатҳи муайяннашаванда расидани вирус дар хун, ВНМО тавассути алоқаи ҷинсӣ ба дигарон намегузарад. Намояндагӣ таъкид кардааст, ки худтабобаткунӣ хатарнок буда, шахсони гирифтори ин вирус бояд ҳатман таҳти назорати табиб мудаво шавад.

📱 Обуна шавед — Ҳамдастӣ
📱Ба Тик Токи мо обуна шавед