Таҷдиди неругоҳи "Варзоб-2" мавзӯи меҳвари дар мулоқоти Далер Ҷумъа бо намояндаи JICA дар Тоҷикистон

Вазири энергетика ва захираҳои оби Тоҷикистон Далер Ҷумъа бо роҳбари намояндагии Агентии Ҷопон оид ба ҳамкориҳои байналмилалӣ (JICA) дар Ҷумҳурии Тоҷикистон Ёшимаса Такэмура мулоқот анҷом дод. Дар меҳвари суҳбати ҷонибҳо раванди татбиқи лоиҳаҳои муштарак дар соҳаи энергетика, аз ҷумла бунёди зеристгоҳи нави барқии 220 кВ дар шаҳри Душанбе ва таҷдиду навсозии Неругоҳи барқи обии «Варзоб-2» қарор гирифтанд.

Ҳамзамон, ҷонибҳо масъалаҳои густариши ҳамкориҳоро дар самти рақамикунонии соҳаи энергетика, баланд бардоштани самаранокии истифодаи неруи барқ ва рушди иқтидори кадрии соҳа мавриди баррасӣ қарор доданд.

Дар ин замина, ба масъалаи тақвияти ҳамкориҳо дар самти омодасозӣ ва такмили ихтисоси мутахассисони соҳаи энергетика, аз ҷумла тавассути истифодаи имкониятҳои таълимию илмии Донишкадаи энергетикии Тоҷикистон, таваҷҷуҳи махсус зоҳир гардид. Дар фарҷоми мулоқот ҷонибҳо омодагии худро ҷиҳати таҳкими ҳамкориҳои мутақобилан судманд ва пешбурди ташаббусҳои муштарак дар самтҳои афзалиятноки соҳаҳои энергетика ва захираҳои об изҳор намуданд.

📱 Обуна шавед — Ҳамдастӣ
📱Ба Тик Токи мо обуна шавед