Доир ба Шабакаи иқлимии TajCN дар Душанбе мизи мудаввар баргузор гардид

Дар Душанбе бо ташаббуси Кумитаи ҳифзи муҳити зисти Тоҷикистон ва Маркази минтақавии экологии Осиёи Марказӣ дар Тоҷикистон мизи мудаввар доир ба Шабакаи иқлимии TajCN баргузор гардид. Гуфта шуд, ки Тоҷикистон яке аз нуқтаҳои гарми иқлимии сайёра ва яке аз кишварҳои осебпазиртарини тағйирёбии иқлим дар минтақаи Аврупо ва Осиёи Марказӣ мебошад ва дар ин замина, созмонҳои экологӣ дар мубориза бо тағйирёбии иқлим ва таъсири он нақши муҳим мебозанд, бо ҷомеаҳои осебпазир, деҳқонон, занони деҳот ва ҷавонон ҳамкорӣ мекунанд, навовариҳо ва равишҳои ҷомеаро бо баробарии гендерро дастгирӣ мекунанд.

Мубодилаи таҷриба ва баланд бардоштани огоҳии ҷомеаи шаҳрвандӣ дар масъалаҳои тағйирёбии иқлим яке аз ҳадафҳои асосии Шабакаи иқлимии TajCN мебошад, ки бо ташаббуси ташкилотҳои ҷамъиятии экологӣ таъсис ёфтааст. Зимни баргузории Муколамаҳои иқлимӣ, иштирокчиён музокироти байналмилалии иқлимии дарпешистодаи Конфронси тарафҳои қолабии СММ оид ба тағийёбии иқлим COP31, ки дар моҳи ноябр дар Туркия баргузор мегардад, заминаи умумии онҳо ва интизориҳо ва афзалиятҳои ҷомеаи шаҳрвандиро баррасӣ карданд.

Ҳайати иштирокчиёни мизи мудаввар, коршинос ва мутахассисони байналмилалӣ дар муҳокимаҳо ширкат варзида, презентатсияҳо пешниҳод намуда, ба саволҳои иштирокчиён посух доданд. Дар пешорӯи баргузории Конфронси тарафҳои қолабии СММ оид ба тағийёбии иқлим COP31, аъзои TajCN инчунин мавқеъҳо ва тавсияҳоеро, ки бояд дар саммити иқлимӣ ба мардум пешниҳод карда шаванд, баррасӣ карданд.

Бо назардошти осебпазирии баланди аҳолӣ, заифии экосистемаҳои кӯҳӣ, иқтидори маҳдуди мутобиқшавӣ ва маблағгузории иқлимӣ, созмонҳо ва ҷомеаи шаҳрвандӣ дар пешбурди сиёсати пуршиддати иқлимӣ ва иштироки фаъолона дар COP31 пуштибонӣ мекунанд ва даъват мекунанд, ки ба ҳифзи ҷамоатҳои осебпазир ва масъалаҳои адолати иқлимӣ таваҷҷӯҳи махсус зоҳир карда шавад.

📱 Обуна шавед — Ҳамдастӣ
📱Ба Тик Токи мо обуна шавед