Баландии сарбанди НБО «Роғун» ба 190 метр расид

Баландии сарбанди НБО «Роғун» дар Тоҷикистон ба ҳудуди 190 метр расидааст. Баландии ниҳоии сарбанд тибқи лоиҳа бояд ба 335 метр расад, ки пас аз анҷоми сохтмон онро ба яке аз баландтарин сарбандҳои ҷаҳон табдил медиҳад.

Дар баробари идомаи сохтмон, истеҳсоли неруи барқ низ идома дорад. Айни ҳол аз 6 агрегати пешбинишудаи неругоҳ 2 агрегат фаъолият мекунад ва бо афзоиши марҳилавии иқтидори истеҳсолӣ ҳаҷми барқи тавлидшаванда низ бештар мегардад. Сокинони Тоҷикистон, ки ҳамасола бо камбуди шадиди нерӯи барқ дар фасли сармо рӯбарӯ ҳастанд, умедворанд, ки бо анҷоми сохтмони ин "иншооти аср" маҳдудиятҳо дар интиқоли барқ ба "афсона" табдил мешавад.

Лоиҳаи сохтмони НБО «Роғун» аз ҷониби ширкати итолиёвии Webuild дар фармоиши ҶСК «НБО Роғун» амалӣ мешавад. Арзиши лоиҳа тибқи маълумоти интишоршуда тақрибан 2,3 миллиард доллар арзёбӣ мешавад. Вале мақомот эътироф мекунанд, ки ба далели боло рафтани арзиши маҳсулоти сохтмонӣ арзиши ниҳоии ин сохтмон бамаротиб бештар мешавад.

📱 Обуна шавед — Ҳамдастӣ
📱Ба Тик Токи мо обуна шавед