Бу айның беренче чәршәмбесендә Йортта катлаулы теманы күтәрергә уйладык. Ул татар телендә фән һәм татар фәненә нисбәтле күптәнге эшләребезнең бер дәвамы да булып тора. Димәк, 3 июньдә татарча фәлсәфә һәм татар фәлсәфәсе турында сөйләшәбез, тыңлыйбыз, хисләнәбез.

«Гыйлем» проекты традицияләрен дәвам итеп, кечкенә бер лекция укыячакмын. Анда сүз татарча философия дәреслекләре төзегән галимнәр турында булачак. Кайбер өзекләрне дә укырбыз, кызыклы булыр дип уйлыйм.

Ачык әңгәмәдә барып чыккан һәм барып чыкмаган фәлсәфи белем бирү проектлары һәм татар телендә мөстәкыйль философия корырга омтылучыларның уңышлары/уңышсызлыклары турында гәпләшергә чакырам. Казбек Гыйззәтовның философия һәм эстетика дәреслекләре турында кызларының истәлекләрен ишетү дә кызыклы булыр: анда гаять гыйбрәтле хәлләр булган икән.

Азат Вәлиев (КФУ Иҗтимагый-фәлсәфи фәннәр институтын тәмамлаган кеше, сүз уңаеннан) сез болай да яхшы белгән музей залларына башкача караш ташларга мөмкинлек бирәчәк һәм сезне озатып барачак.

Ә инде ахыргы чарабыз музей чормасында үтәчәк. Нәрсә килеп чыгасын үзем дә дулкынланып көтәм. Безнең өчен гадәти булмаган киңлектә пластик перформанс булачак.

Әйдәгез, җәйнең беренче чәршәмбе кичендә яңа белем һәм яңа эмоцияләр туплыйк.