👆👆👆
یازیچی #محمدرمضانی‌نین «آل‌ین یازیسی» اثری‌نین ایفاده‌ طرزینی، اوسلوبونو، اینجه‌لیینی، ان اساسی ایسه درینلیینی چوخ سئودیم. ایفاده‌ اوسلوبو، رومان تئکنیکلری ایسه اؤزونه مخصوص ایدی. باشقاسینی یامسیلامیر. حادثه‌لری ده باشقا جورا بیر-بیرینه کئچید ائدیر. قاییتدیغی میفیک (اوسطوره‌وی‌) مسئله‌‌سینده ده باشقالارینی تکرار ائتمیر. اثر، میستیک و بعضا ناغیل سایاغی بیر دیلله فرقلی باخیش بوجاقلاری ایله اوخوجودا تأثیر بوراخیر.

#آل‌ین‌یازیسی اثرینده سؤزون گئرچک آنلامیندا، بیریسی جان وئریب جان آلیر. «قوجا آل» سانکی دوغااوستو بیر وارلیق‌دیر. اؤزونو حیاتین گئرچک‌لیکلرینه سالیر. آناقیزا ایکی اوشاق وئریر. نئچه ایلد‌ن سونرا ایسه اونلارین بیرینین جانینی ایسته‌ییر. بو، انسانین تاریخ بویو سینادیغی، گؤردویو بیر اؤلوم-دیریم مسئله‌‌سی‌دیر. یازیچی گؤرونن، اؤز آخاری ایله آخیب سونا وارا بیلمه‌‌ین بیر حیات توپلومونو تصویر ائدیر. هر شئی نیسبی اولاراق شرطلر واسیطه‌سی ایله یاشانیر. اؤزونو آناقیزا گؤستردییی گوندن اونو غریبه حادثه‌لرله سیناییر بو قوجا آل. بو قوجا یالنیز بیریسینه یاخینلاشا بیلمیر. مدریک «همای» آنایا. همای خوشبخت‌لیین زیروه‌سی‌دیر. اسکی ادبیاتدا دا «همای» قوشو «سعادت قوشو»دور. بو هر بیر انسانین اوره‌یینده وار. ساده‌جه اونون آردینجا گئتمک لازیم‌دیر. آناقیز، اوره‌یینین دئدیکلرینین آردینجا گئدن خوشبخت انسانلاردان بیریسی‌دیر. آناقیزین حیات اراده‌‌سی وار. او یورولمادان اؤلوم آدلی آنلاییشین قارشیسینا چیخیر.

آناقیز اوچون اوغلانلاری دونیایا گتیرمه‌میشدن اؤنجه‌ یاشادیغی محیطین دیرچلمه‌سی، اورادا یاشایان انسانلارین حیاتی اؤنملی‌دیر. اونلارین حیاتینین داوامی، آناقیزین اوغلان اوشاغی دونیایا گتیرمه‌‌سیندن آسیلی‌دیر. بو، «قوجا آل»ین الیندن گله‌سی ایشدیر. اوّلجه‌دن اونلار سوودالاشیرلار. هر شئی بیلرکدن اولور. آنجاق آناقیز، اهالی‌نین حیاتینی خلاص ائتدییی حالدا اؤزونون جانی-جییری اولان اوغلونو دا خلاص ائتمه‌لیدیر. طالعی ایله مبارزه‌یه کئچیر. آنجاق یازار «جبرچی» دوشونجه‌‌ ایله آناقیزی بو طالعین قارشیسیندا قویاراق نهایت ده اونا یئنیلدیینی گؤستریر.

اثرده انسانین اَزَلی یارانیشی‌نین دا اوسطوره‌وی چالارلاری عکس اولونور. «آلما» و اونون ایکییه بؤلونه‌رک قادین-کیشی آراسیندا بؤلونن سئوگی‌نین میفیک چالارلاری، ایکی جوتلوک یعنی آناقیزلا داش‌دیندیرن آراسیندا سئوگینی و اونلارین واسیطه‌سی ایله بیر ائل و کندین نسیل‌لره آرتماسینی سیمبولیزه ائدیر.

آل‌ین یازیسی اثری، سنی اوبرازلاری و اونلار اوچون اولایلاشان حادثه‌لری ایله گاه سئحیرلی دونیایا آپاریر، گاهدان دا بیر آنین ایچینده گئرچک دونیایا یووارلادیر. بیر-بیریندن فرقلی، ماراقلی، اوزرلرینه یوکله‌نن معنالی، بعضا آرخائیک‌لشن بعضا ایسه گونجل‌لشن اوبرازلار رومانی داها دا اوخوناقلی ائتدی منیم اوچون. «آل‌ین یازیسی» اثری، رئال گلمه‌سه ده رئال حادثه‌لر اساسیندا قلمه آلینیر. انسانلارین اطرافیندا اولایلاشان حادثه‌لرین ایناندیریجی‌‌لیغینی سیناییر. چوخ حاللاردا ایناندیریجی اولمایان اوبرازلار، اونلارین سوژئت ماجرالاری اثری ده میفیک‌لشدیریر. اوبرازلار فرقلی و دوغااوستو اوبرازلاری خاطیرلاسا دا یازیچی اونلاری باجاریقلا بو دونیایا باغلاییر و بونونلا دا اثری ایناندیریجی ائدیر. «قوجا آل» کیشی چوخ یاشادیغینا گؤره غیرعادی و غیررئال گلیر. آنجاق اونون رئال انسانلارلا داورانیشی عادی و گونده‌لیک مسئله‌لر اوزره دانیشیغی، اونلارلا قوردوغو مناسبتلری رئال حیات چرچیوه‌سینده جانلانیر. یاشینا فیکیرلشدیکده اونو هارداسا غیررئال و آدی بیلینمه‌ین داغلار آرخاسیندان، اوزاق فضالاردان گلیب رئال انسانلار آراسینا دوشدویونو سانیرسان. آنجاق اونلاری بیر-بیرینه باغلایان یوخو و کابوس یوخ، رئال‌لیقلاردیر. بوتون بو اؤزللیکلر، اثری #سئحیرلی‌رئالیزم اوسلوبوندا یازیلماسیندان خبر وئریر.
.
✍️همت شهبازی
⚖️ #تنقید

https://telegram.me/dusharge1
☘️