سالیده شریفووانین «چاغداش آذربایجان پست‌مدرن رومانی» علمی-تنقیدی اثری، سایین دوستوم #رحیم‌خیاوی طرفیندن عرب الیفباسینا کؤچوروله‌رک ایشیق سایتی طرفیندن ائلئکترون نشر اولوبدور. بیلدییم قدر ائلئکترون نشرین سببی، اثرین علمی آنلاییشلاری‌نین چوخلوغو و بو آنلاییشلارین ارشاد اداره‌سی اساسلارینا اویغون اولمادیغی اولموشدور.
اثر آذربایجان پست‌مدرن رومانی‌نین نظری-مئتودولوژی بازاسینی، یعنی پست‌مدرنیزم نظریه‌سی‌نین اساس آنلاییشلارینی (دئکانستراکسییا (یاپی‌سؤکومچولوک/ قورولوش‌داغیتما)، ژانر قاریشیق‌لیغی، متن مرکزلی‌لییی، تاریخین خطی‌لییی‌نین انکاری) تقدیم ائتمه‌یی مقصد گؤتورور کی، بو دا کیتابین سونراکی فصیللرده کانکرئت آذربایجان متنلرینین تحلیلینه گیریش رولونو اویناییر. یعنی کیتاب، پست‌مدرنیزمین نظری-تئرمینولوژی اساسلارینی آراشدیریر و بونو آذربایجان پست‌مدرن رومانی‌نین تحلیلی اوچون دایاق کیمی قورور.
نظری-تاریخی یوزوم کیمی متن بیلگی‌لندیریجی‌دیر. مؤلف "پست‌مدرنیزم" تئرمی‌نین قایناغینی (رودولف پانویز، ۱۹۱۷؛ فئدئریکو دو اونیس، ۱۹۳۴، لیوتار، چارلز جنکز و...) دیققتله ایزله‌ییر و تئرمی‌نین تکامولونو تاریخی آردیجیل‌لیقلا گؤستریر.
اثرین اساس اوستونلویو اوندان عبارت‌دیر کی، مؤلف مدرنیزم-پست‌مدرنیزم ایلگیسی حاققیندا یئترینجه گئنیش نظریه‌چیلرین او جومله‌دن لیوتار، واتیمو، فوکو، تووینبی، هابئرماس، جیمسون، ایهاب حسن، برایان مک‌هیل، ایگلتون، اوکتاویو پاز کیمی‌لرین دئدیکلرینی بیر یئره توپلاییر. متن داها چوخ بو نظریه‌چیلرین فیکیرلرینین آردیجیل سس‌لنمه‌سیندن عبارت‌دیر. مؤلف بو فیکیرلر آراسینداکی ضدیتلری تحلیل ائتمیر و اؤزونون بو موقعلردن هانسینا طرفدار اولدوغو، یاخود بونلاری نئجه سینتئزلشدیردییی آیدین دئییل. حال‌بوکی، علمی مونوقرافییادا گؤزله‌نیلن بودور کی، مؤلف وار اولان فیکیرلری یالنیز توپلاماقلا کیفایتلنمه‌سین، اونلاری تنقیدی شکیلده دَیرلندیرسین و اؤز نظری یاناشماسینی دا فورمالاشدیرسین. بو، متنده دئمک اولار کی، یوخدور. آنجاق بوتون بونلارا باخمایاراق متن، اوخوجویا ساحه‌نین چوخ‌بوداقلی‌لیغینی گؤسترمک باخیمیندان دَیرلی‌دیر. چونکی بو نظری یاناشمالار، بللی اثرلره (جولیان بارنسین "فلوبئرین طوطوقوشوسو"، رولان‌بارتین "س/ز S\Z" اثری، اومبئرتو ائکونون "قیزیل‌گولون آدی") مراجعت اولونماسی مثبت حالدیر. چونکی بو، متنی صرف مجرد تئرمینولوژیلیکدن قورتاریر. خارجی نمونه‌لرله یاناشی آذربایجان پست‌مدرن رومانیندان دا نمونه‌لرین تحلیل اولونماسی اثرین باشقا مثبت یؤنلریندن ساییلیر.
بعضا فیکیرلر آراسیندا منطیقی کئچیدلر کسکین و ایضاح‌سیزدیر. مثلاً، تاریخ فلسفه‌سیندن (تووینبی، ایشپئنگلئر) بیرباشا "من" فئنومئنی‌نین کئچیجی‌لیینه (فوکو) کئچید، اورادان درحال دئکانستراکسییایا (دئریدا) کئچید ائدیلیر، آنجاق بو کئچیدلرین داخیلی منطیقی ایلگیسی آیدین شکیلده قورولمور.
بعضا ده مؤلف پست‌مدرن آنلاییشلارین تحلیلینه سطحی یاناشیر. مثلاً، دئکانستراکسییا آنلاییشی آچیقلانارکن:
"ائلئمئنتلرین خاوتیک ییغینینی تمثیل ائد‌ن وارلیغین بدیعی یانسیماغینی عکس ائتدیرن آلَت‌دیر" (ص13)
تعریف اؤزو غیردقیق و حتتا ژاک دئریدانین اؤز نظریه‌سینی تام دوزگون یانسیتمیر. دئکانستراکسییا "خاوتیک [نظامسیز] ییغینی" عکس ائتدیرن آلت دئییل، متن‌ایچی دوزنلی (ایئرارخیک) قارشی‌دورمالاری آیدینلاشدیریب سارسیدان اوخونوش ایستراتئژیسی‌دیر. بو جور ساده‌لشدیرمه‌لر بیر نئچه یئرده گؤرونور.
#همت‌شهبازی
موغان- 18/6/1405
☂️☂️☂️
https://t.me/dusharge1