📌
ایران‌سفیرلییی‌تاریخی‌بینادا یئرلشیر
⛪
ایران سفیرلییی‌نین بیناسی، باکی‌نین تاریخی یئرلریندن اولان #ایچری‌شهرین مشهور تاریخی بینالاریندان‌دیر.
واختی ایله بو بینادا محمدامین رسولزاده‌نین قوردوغو آذربایجان‌جمهوریتی علیهینه ائرمنی داشناک استئپان شائومیان‌لا سیخ علاقه‌ده اولان ایلک آذربایجانلی ناظیر (وزیر) آیناسلطانووانین شخصی یاشاییش مکانی ایمیش. بو بینا مشدی الهوردی‌یه مخصوص ایدی. کومونیست‌لر اونو غصب ائتمیشدیلر.
آینا سلطانووا، ۱۹۱۸ده بیر بلشویک کیمی، شائومیانین آذربایجانلی‌لار علیهینه تؤرتدییی مارت قیرغینلاریندا اشتراک ائدیر.
کومونیست دؤورونده مختلیف وظیفه‌لر آلیر. حجاب و اؤرتویو آتان ایلک آذربایجانلی قادین‌دیر. او، ۱۹۳۷ده رئپرئسییا قربانلاری سیراسیندا خالق دوشمنی کیمی، قارداشی و حیات یولداشی ایله بیرگه گولـله‌نیر. بیناسی ایسه، دولت الینه کئچیر.
مستقل‌لیک دؤورونده نریمان نریمانوف کیمی اونا دا اولان مناسبت قاریشیقدیر.
سووئتلر داغیلدیقدان سونرا، سؤزو گئدن بینانی ایران دولتی آلاراق اورانی سفیرلیک ائدیر. ایندیلیکده ایران سفیرلییی بو تاریخی بینادا یئرلشیر.
✍️ همت شهبازی
#یادداشلار
🪵🪵
https://t.me/dusharge1
🔥
Post #27
300
- 👍 8