🦜
یاز دردیمی ساغالتمادی،
یاراما بیر قیش باغلایین،
گؤیلومه بولود دؤشه‌یین
گؤزومه یاغیش باغلایین
(نادر الهی، 1395: 96)

کلاسیک پوئزییادا «یاز» عادتا سئوگینین یئنی‌لنمه‌سی، حیاتین اویانیشی کیمی تقدیم اولونور. فضولی یاز فصلینی «گول، بولبول و باغ» اوبرازلاری ایله بیرلشدیره‌رک، سئوگی اضطرابینی طبیعی گؤزللیکله تاماملاییر:

خزان غمده گؤردون اضطرابین بولبول زارین،
بهار ایامی تک گلبرگ خنداندان خبر وئردین
(فضولی، 1392: 513)

نسیمی‌ده «یاز» حاققا یؤنلمه‌نین ایشیقلی مرحله‌سی، قیش ایسه نادانلیغین و غفلتین سیمبولودور.

اگرچی فرقتین قیش‌دیر کی، اَلبَرد عدُوُّ‌الدّین،
حقه منّت کی، وصلیندن گول آچیلدی، باهار اولدو
(نسیمی، 1387: 366)

اوستاد شهریار، «یاز»ی، کند حیاتینین، گنجلیک خاطره‌لرینین پوئتیک تملی کیمی ایشلتمیش‌دیر.

نادر الهی‌ده ایسه «یاز» اومیدین داشییجیسی اولسا دا، بو اومید گئرچکلشمیر:
«یاز دردیمی ساغالتمادی».
یاز فصلی، حیاتین اویانیشی، اومید و سئوینجین رمزی اولسا دا، شاعرین دردینه ملهم اولا بیلمیر. باشقا شعرینده ده بونو ایفاده ائدیر:

بیر آن گؤزلرینده یاز گولومسه‌ییر
حییف کی قیسادی عؤمرو یازیمین (ص132)

شعرین‌ زیروه‌سی (اختر یاییم‌ائوی) کیتابیمدان : صص ۱۳۰-۱۲۹
🔹🔹🔹
https://t.me/dusharge1