آذربایجان دئموکرات فیرقه‌سی فارس‌دیللی بیر ژورنالیستین گؤزو ایله
۱۲ شهریور بیان‌نامه‌سی‌نین ایل دؤنومو
"فرقه دموکرات" (=دئموکرات فرقه‌سی) کیتابی، او دؤورون ایران باش ناظیری قوام‌السلطنه طرفیندن آذربایجانا گؤندریلمیش نماینده هئیتی ایله بیرلیکده ائتدییی سفر زامانی مؤلفی ابوالحسن عمیدی نوری‌نین قلمه آلدیغی قئیدلر اساسیندا حاضیرلانمیشدیر. بو هئیتین اساس مقصدی سووئت قوشونلارینین آذربایجاندان چیخاریلماسی سورجینی یاخیندان گؤرمک و بو حاقدا بیلگی‌لری حاضرلاماق ایدی.
نماینده هئیتی ۱۳۲۵.جی ایلین خرداد آییندا (۱۹۴۶-جی ایلین ایونوندا) آذربایجانا داخیل اولموش، بیر نئچه گون عرضینده زنجان–تبریز–اورمو یولو، و یول‌اوستو شهرلری گزمیشدیر. مؤلف "داد" قزئتی‌نین ژورنالیستی ایدی و بو قئیدلری همین ایلین مرداد آییندا، یعنی آذربایجان دئموکرات فرقه‌سی‌نین حاکمیتی دؤورونده، تهراندا سیرا مقاله‌لر شکلینده چاپ ائتدیرمیشدی. سونرالار بو یازیلار یوخاریدا آدینی چکدییم کیتاب حالیندا نشر اولوندو.
قئید ائدیلمه‌لی‌دیر کی، نماینده هئیتی تورک دیلینی بیلمه‌دییی اوچون #سیدجعفرپیشه‌وری اونلارا ترجمه‌چی آییرمیشدی. بو مقامی اؤزللیکله اونا گؤره وورغولاییرام کی، اوخوجو کیتابداکی مشاهده‌لری هانسیسا تعصب‌کئش آذربایجانلی‌نین و یا بو گون دئییلدییی کیمی، بیر "پان‌تورکچونون" قئیدلری حساب ائتمه‌سین.
مؤلف یازیر کی، "آژیر" قزئتی‌نین نشریندن اعتباراً پیشه‌وری ایله تانیش و دوست اولموشدور. آنجاق بو دوستلوق عینی دیلی دانیشمالاریندان ایر‌ه‌لی گلمیردی. بونا گؤره ده معاصر اوخوجو بو قئیدلری فارس‌دیللی بیر ژورنالیستین گؤردوکلری کیمی دیرلندیرمه‌لی، اونلاری اؤزونوتعریف، تعصب‌کئش‌لیک و یا پان‌تورکیزم کیمی دیرلندیرمه‌مه‌لی‌دیر.
کیتاب بویو مؤلف ۲۱ آذر ۱۳۲۴.جو ایلدن اعتباراً آذربایجان ملی حکومتی‌نین سیاسی، اجتماعی و سوسیال ساحه‌لرده حیاتا کئچیردییی مترقّی و قاباقجیل فعالیتلردن بحث ائدیر. کیتابی اوخویارکن انسان دولت رهبرلرینین توپلوما، انسانلارا و اجتماعی ریفاها خیدمت ائتمه‌سی‌نین نئجه مومکون اولدوغونو حیس ائدیر.
بیر ایل عرضینده گؤرولن ایشلر حقیقتا ده دیققته لایق ایدی. بونو من دئمیرم؛ بونو آذربایجانین مختلیف شهرلرینی گزه‌رک گؤردوکلرینی قلمه آلان فارس‌دیللی ژورنالیست یازیر.
سفرین سون گونو مؤلف یئنیدن تبریزه قاییدیر و #پیشه‌وری ایله بیرلیکده اونلارین گؤردویو ایشلرله تانیش اولماق اوچون شهری گزیر. اونلار تبریزده‌کی فابریکلردن بیرینه باش چکیرلر و مؤلف گؤردوکلرینی بئله تصویر ائدیر:
«روحوموزا درین تأثیر ائد‌ن باشقا قوروملاردان بیری ده فهله‌لر اوچون یارادیلمیش رئستوران و کلوب ایدی. بو بؤلمه ۲۱ آذر انقلابیندان سونرا و آذربایجان حکومتی‌نین فابریکلر اوزرینده نظارتی نتیجه‌سینده یارادیلمیشدی. بورادا فهله‌لرین ناهار ائتمه‌سی، توپلاشماسی و استراحتی اوچون هر جور شرایط حاضیرلانمیشدی... بوندان باشقا فوتبال مئیدانچاسی، اوزگوچولوک حووضو، فابریکین آرخاسیندا آغاج و تره‌وز اکیلمه‌سی اوچون باغچا دا سالینمیشدی... بو فابریکده ان چوخ دیققتیمی چکن جهت ایسه فهله‌لرین بوتون احتیاجلارینین نظره آلینماسی ایدی: حامام، رئستوران، کلوب، قادینلار اوچون دوغوم ائوی، فهله‌لرین سودامر اوشاقلاری اوچون اوتاق، اونلارین یاتاق اوتاقلاری، حتتا اوشاقلار اوچون اویونجاق اوتاغی بئله ان یاخشی و ان مکمل شکیلده حاضیرلانمیشدی...
من بو باره‌ده پیشه‌وری‌دن سوروشاندا او، گولومسه‌یه‌رک دئدی: 'بونلارین هامیسی ایشه سئوگینین و اینامین معجزه‌سی‌دیر. انسانلار رهبر وظیفه‌لره اؤز جیبلرینی دولدورماق اوچون دئییل، خالقا خیدمت ائتمک اوچون گلنده، قانونلاری جسارتله و قطعیتله حیاتا کئچیرمک گوجونو ده تاپیرلار.»
✍️ #همت‌شهبازی
🐫🐫
https://t.me/dusharge1