🪑
«آذربایجان شعرینده مدرنیزم» کیتابیم حاقدا آچیقلاما

ظن ائدیردیم «آذربایجان شعرینده مدرنیزم» کیتابیملا تنقید ساحه‌سینده بؤیوک بیر فاکت و یئنی‌لیک اورتایا قویموشام. بونونلا تنقیدچیلییمیز اؤزونو گؤستره بیلدی. البته، بعضیلری بونو شیشیرتمه حساب ائد‌ه‌جک. قوی بئله اولسون. اما من اؤزوم شیشیرتمه‌لردن اوزاغام. هر شئیی اولدوغو کیمی گؤره‌رک دَیرلندیریرم. من بو کیتابدا، اوخوجونو مدرن شعرین پوتئنسیالینا دقّت یئتیرمه‌یه چاغیریرام، همچینین توپلومون ادبیاتی دوزگون دَیرلندیرمه‌سینه دستک اولورام.

چوخلاری آذربایجان شعری‌نین مدرنلشمه‌سینه شوبهه ایله یاناشیر. ائشیدیرم بعضیلری طعنه ایله دئییر کی، کیتابدا آدلاری چکیلن مدرن شاعرلرین بعضیلرینی باشقا اؤلکه‌لره ده اخراج (صادر) ائتمک اولار!.
بو آتماجا سؤز اؤزو ده دوشوندوروجودور. بو سببدن همین آتماجا سؤزلرین مؤلفلریندن سس‌لندیردیکلری ائله بو آتماجا سؤز حاققیندا ایکی صحیفه‌ده آچیقلاما ایسته‌سک، بونو ائده بیلمه‌یه‌جک. چونکی اونلار فیکرلرینی گئنیش شکیلده ایضاح ائتمکده چتین‌لیک چکیرلر، اما آتماجا سؤزلرده چوخ باجاریقلی‌دیرلار. آتماجا سؤزلره اؤیره‌شنلر، ساده‌جه بیر جمله‌لیک، یاخود بیر پاراقراف اؤلچوسونده بوندان آرتیق بیر شئی دئمک ایسته‌ینده یا تکرارا دوشور، یا دا موضوعدان کنارا چیخیرلار.
ان یاخشیسی بودور کی، «شعریمیزده مدرنیزم یوخدور» دئینلر فورصتی قاچیرماسینلار. چونکی اونلار شعریمیزین «دردینی» تاپیبلار: یعنی اونون مدرن اولمایان طرفینی. ایسته‌مه‌یه‌نین گؤزو کور! بویورسونلار، اؤزلری یازسینلار، مدرن اولسونلار. بیز ده دئیک کی، آذربایجان شعرینین پوتئنسیالی بودور.
بوتون بونلارا باخمایاراق، من کیتابیمی کیچیک بیر داملا ساییرام. آنجاق او داملا اولماسایدی، هانسی اثره گؤره اؤیونه بیلردیک؟ اگر ایری حجملی بیر تنقید کیتابی وارسا، دئمه‌لی، بو ادبیاتین دا هارداسا سؤزو وار. بو، کاسیب بیر ادبیات دئییل.

منیم کیتابلاریمین کؤکو، ۹۰ فاییز حیاتدا اولان یازار و شاعرلرین اثرلری ایله مشغول اولماقدادیر. بو ایسه، بیر طرفدن بؤیوک جسارت طلب ائدیر. چونکی چوخلاری حیاتدا اولان بیریسی حاققیندا یازارکن دوستلوقلارینین پوزولاجاغیندان، بعضا ده عکسینه، دوستلوقلارینین محکمله‌نه‌جه‌ییندن احتیاط ائدیرلر.

#همت‌شهبازی
#تنقید
............
https://t.me/dusharge1