🪑
70.جی اون‌ایللیکده مدرن شعریمیزه گیریش
70.جی اون‌ایللیکده یازیلان مدرن شعریمیزه گیریشمه‌دن اؤنجه، شعریمیزی دستکله‌ین و همچنین گلیشمه‌سینه سبب اولان ایکی عامیلدن ده سؤز آچماق ایستردیم. بیریسی تبریزین آزاد بیلیم‌یوردو و عمومیتله او دؤورون ایلکینده تشکیل تاپان شعر درنک‌لری ایدی. ایکینجیسی ایسه بو زاماندا «فروغ آزادی» (سونرا یئنیدن «مهد آزادی» آدی ایله نشر اولدو) آدی ایله چیخان قزئتین تورکجه بؤلومو صحیفه‌سی و بو صحیفه‌نی ساهمانلایان رحمتلیک «یحیی شیدا»نین بو شعرلره داها دوغروسو یئنی‌لشن گنج نسله اؤنم وئریب صحیفه‌سینده چاپ ائتدیرمه‌سی و تخمینا 1372.جی ایلدن «قاسم تورکان» طرفیندن هر شنبه‌لر بو قزئتین «آدینه» باشلیغی آلتیندا چاپ اولان صحیفه‌لرین رولو و بیر ده ائله بو قزئتده بعضی شعر تئوری‌لرینه یئر آییران و «ع.ن. چاپار» طرفیندن یاییملانان «قار چیچه‌یی» صحیفه‌لرینی یاددان چیخارماق اولماز. بو صحیفه‌لرده یئری گلدیکده عمومیتله یئنی شعرلر یازان گنج شاعیرلرین شعرلری چاپ اولوردو. آزاد بیلیم یوردوندا اولان شعر ییغینجاغیندا ایسه، شعرله یاناشی، شعر حاقدا قیزغین مباحثه‌لر نتیجه‌سینده 70.جی اون‌ایللیک دئییله‌سی یئنی شعریمیزین محکم اسکئلئتی قورولوردو. داها دوغروسو، بو ییغینجاقدان و بو ییغینجاغین شعرلری‌نین چاپ مکانی اولان فروغ آزادی‌نین تورکجه صحیفه‌سیندن چیخان شاعیرلریمیز مدرن شعریمیزین بینؤره‌سینی قویماقدا اؤنملی رول‌لاری اولدو.
البتده بو زامان، «یول» و «وارلیق» درگی‌لری ده یاییلیردی. آنجاق بونلاردان بیرینجیده داها چوخ آنالیتیک و سیاسی دینی اجمال‌لار یا دانیشیق‌لار گئدیردی. چاپ اولان شعرلر ایسه اؤنملی جریانا چئوریلمه‌دی. ایکینجیسی ایسه داها چوخ علمی تدقیقاتا اؤنم وئریردی. حتتا بو مسئله‌ده یئنه ده بیر سیرا تانینمیش شخصیت‌لر و اوست‌اوسته بوتون سایلاردا عینی یازارلارین یازی‌لاری‌نین چاپ اولماسی یئنی‌چیلییه سوسوز اولان گنج نسلین یازی‌لارینا بو درگیده چاپ امکانی یوخ حددینده‌ایدی.
بو باخیمدان «مدرن شعریمیز»ین گلیشمه‌سینده رحمتلیک «یحیی شیدا»نین اداره ائتدییی تورکجه صحیفه‌سی‌نین دانیلماز رولو واردیر. بو صحیفه‌نین یئتیرمه‌لرینی سایماقدان قورتارماز. اونلارین سونرالار دا شعریمیزده تاثیرلری اولان بعضی‌لرینه اشاره ائدیرم:
هادی قاراچای، کیان خیاو، بهروز صدیقی، سولغون آذری (اسماعیل خرمی)، سوسن نواده‌رضی، عاریف کسکین، م.آذرشین‌فام (وقار)، ائلدار موغانلی، ع.ن.چاپار، محمدرضا مقدسی، حمید شهانقی، ودود دوستی، داود اهری، همت شهبازی، ر.الف.قارتال، حسین مصری، سروناز حسن‌لی، قاسم تورکان، ناصر داوران، احد زمانی و...
بو دؤور شاعیرلرین شعرلری بو قزئتده و آراسیرا باشقا قزئت‌لرده چاپ اولماقلارینا باخمایاراق اونلارین شعرلری کیتاب اولاراق چاپ اولماییردی. حتتا بونلارین بیر چوخلاری‌نین -اؤرنک اوچون «کیان خیاو»، «سوسن نواده‌رضی»، کیمی شاعیرلرین- شعر کیتابلاری 80.جی اون ایللیک شاعیرلریمیزین شعرلری ایله یاناشی چاپ اولدو. «هادی قاراچای» شعرلری‌نین تایپ فورمتی اللرده گزیردی. نهایت اونون کیتابی، 70.جی اون ایللیین سونلاریندا «بئچه‌لر بانلایاندا» باشلیغی آلتدا چاپ اولدو. بعضی‌لری‌نین اؤنمی بو چاغدا دانیلماز اولاراق سونرالار شعردن ال اوزدولر یا دا باشقا ساحه‌یه گیریشدیلر. حمید شهانقی تک کیتابلی شاعیریمیز اولاراق سونرا تدقیقاتلا، صالح عطایی تک کیتابلی شاعیر اولاراق سونرالار نثر یازاری کیمی چیخیش ائتدیلر. بونلار باشقا ساحه‌لره اوغراشدیقلارینا باخمایاراق، شعر ساحه‌سینده بیر نوع ایتکی حساب اولونورلار.
یوخاریدا وورغولادیغمیز شعر ییغینجاغینا گلن شاعیرلرین شعر حاقدا دوشونجه‌سینی و شعری یئنی‌لییه طرف یؤنلتمه‌لری‌نین ده بیر سیرا عامیل‌لری وار ایدی. بیر طرفدن یئنی تورک و آذربایجان جمهوریتی‌نین شعری‌نین بیزده یاییلماسی، بو شعرلره شاعیرلرین اللری‌نین راحاتجا چاتماسی ایله اونلاری اوخویوب تئکنیک‌لری‌نین درینلیینه وارماسی، باشقا طرفدنسه فارس یئنی شعری‌نین تاثیری، هم ده فارس شعرینه یازیلان تنقیدلرینی دریندن اوخونماسی، آذربایجان شعری‌نین مدرن‌‌لشمه‌سینه یاردیم ائدیردی. تنقیدی دوشونجه‌نین سیستماتیک اولاراق‌آرتماسی بو نسیل شاعیرلریمیزده او قدرگوجلو اولموشدور کی حتتا بو ییغینجاقلارا گلن فارس شاعیرلری، یا دا فارس یازان آذربایجانلی شاعیرلری ده ایسته‌نیلن جهتده تنقید ائده بیلیردی. شعر دارتیشمالاریندا، آرتیق کلاسیکچی‌لرله یئنیچی‌لر دارتیشمالاری یوخ، یئنیچی‌لر آراسیندا شعرین ماهیتی حاقدا مباحثه‌لرگئده‌رک حتتا اونلارین آراسیندا فیکیر آیریجلاری اولاراق گروپلاشماغا دا سبب اولموشدور.
.
آردی وار... 👇👇
@dusharge1
👇👇
Post #217
207
dusharge1 | همت شهبازی 📚 #آذربایجان‌شعرینده‌مدرنیزم (۲ جیلدده) ✍️ #همت‌شهبازی اختر نشریاتی، تبریز ۱۳۹۹ . @dusharge1