🗣️🗣️
اورمو گؤلو اطرافیندا اوخونان ماهنی

محمدامین رسولزاده مشروطه چاغیندا، ژورنالیست ایشله‌یه‌رک گؤردوکلرینی باکیدا چاپ اولان «ترقی» قزئتینه گؤنده‌ریر. سونرالار بونلار بیر کیتاب کیمی چاپ اولور و دیرلی تاریخچی #رحیم‌رئیس‌نیا جنابلاری بو کیتابی فارسجایا چئویره‌رک، ۱۳۸۷ دا چاپ ائدیر.

15 ایون 1909 تاریخلی رئپورتاژدا محمدامین رسول‌زاده اورمودان «ترقّی» قزئتینه یازیر کی، یول بویو اورمو گؤلو اطرافیندا #گلمان‌خانا کندیندن کئچرکن اونلاری مشایعت ائدن یولچولارین #ملی‌ماهنی‌لار اوخودوغونو دئییر. او، بو ماهنی‌لاردان بیرینین متنینی ده گتیریر:

«کندی چیخیریق، تپه‌یی آشیریق آرتیق دریا گؤرونمویور. اطراف بوتون باغ‌دیر. گؤیریر. یولچولاریمیز بیزی تفریح اوچون خواهیشیمیزی عمله گتیرمک اوزره ملّی ماهنیلار اوخویورلار. بو ماهنیلاردا نه قدر ساده‌لیک، نه قدر حیسیات طبیعی واردیر. ماهنیلاردان بیریسینی کندچی‌نین للحاضرا نیسبتا توتدوغو نؤقطه-نظری صاف درونانه‌سینی مترجم اولدوغو جهتدن شایان-قئید اولدوغوندان بورادا ذکر ائدیوروز. ماهنی جاوان بیر کندلی دیلیندن اؤز سئوگیلیسینه خیطابا دئییلیر:

آبی، یاشیلی گئیینر.
زبونی## یئردن سورونر.
یئل وورار ممه‌ن گؤرونر.
یاندیم، یاناسان، آی قیز!
خیردا قالاسان، آی قیز!
آپارارلار خان یانینا
منی داناسان، آی قیز!
قند اولاسان، شکر اولاسان
جیبه دولاسان، آی قیز!
خیردا قالاسان، آی قیز!
آپارارلار انجمنه
منی داناسان، آی قیز!

ایشته عاوامجاسینا دئییلن بو شعیرلرده‌کی متأثر سؤزلر کندیستان حیاتینا بیر شعله سالییور دا، اونو بوتون حقایقی ایله آشیکار ائدیور.»

(رسولزاده، «ترقّی» نؤمره 144، 30 ایون 1909).

رسولزاده‌نین قئیده آلدیغی نمونه ۲۰.جی عصرین اوللرینده شیفاهی فولکلور محیطینده اوخونان بیر ماهنی‌دیر. بللی اولان بو ماهنی یایغین ماهنی ایمیش. گؤره‌سن، همین ماهنی بو گون ده خالق آراسیندا یاشاییرمی؟ اگر یاشاییرسا، اونو موسیقیچی‌لریمیز نییه اوخومورلار؟ اونون موسیقیسی ایتمه‌مک اوچون، یئنیدن موسیقییه یازیلمالیدیر.
اگر بو ماهنی اوخونمورسا، اونو هانسی اصوللارلا برپا ائتمک و یئنیدن فولکلور دؤورییه‌سینه قایتارماق مومکوندور؟ بونو فولکلور آراشدیرمالاری، آشیق صنعتکارلاریمیز آختاریب آراشدیرمالیدیرلار.


۱. # باکی چاپیندا گولمه‌خانا یازیلیب. رحیم رئیس‌نیا، گلمان‌خانه ترجمه ائدیب. بونون هانسی دوغرو اولدوغونو اورادا یاشایانلار داها یاخشی بیلرلر.

۲. ## (زبونی zobunı =پالتار، تومان‌کؤینک، دامن)


✍️همت شهبازی
#یادداشت
☘️☘️
https://t.me/dusharge1