📖📖
حالال آنا دیلینده یازماق

حامد رحمتی زنگان شاعرلریندن‌دیر. ایللردیر تانییرام و شعرلرینی ایزله‌ییرم. او، ایندییه قَدَر نشر ائتمیش کیتابلارینی فارس دیلینده یازیب و بو دیلده قَلَمه آلدیغی شعرلری ایله فارس ادبی محیطینده اؤز سؤزونو دئیه بیلمیشدیر.

یاخین گونلرده اؤیرندیم کی، او، دوغما آنا دیلینده ده شعر کیتابی نشر ائتمک نیتینده‌دیر. بو، چوخ سئویندیریجی بیر خبردیر. چونکی اونون آشاغیداکی شعریندن ده آچیق-آیدین گؤرونور کی، آنا دیلینده یازماق اوچون جیددی پوتانسیالا صاحبدیر.
بو شعرده شاعر سئوگی ایله یارالانما، گؤزللیک ایله عذابین سرحدینی قصدن بولانیقلاشدیریر و دیلی هم شاعیرانه، هم ده بیچاق کیمی کَسکین بیر ایفاده واسیطه‌سینه چئویریر. نتیجه‌ده شعر، دویغونون ایچیندن دوغان، هم آغرییان، هم ده اؤز آغریسینی ائستئتیکایا چئویرن بیر متن تاثیری یارادیر. شعر، موغانین تصویرینی صرف بیر انسان کیمی دئییل، طبیعت، آغری و گؤزللیک آراسیندا پارچالانان سیمبولیک بیر فیقور کیمی تقدیم ائدیر.

دوغما دیلده یازماق سنه بینلی-‌برکتلی اولسون عزیز دوستوم.
🦜🦜
✍️شعر: #حامد_رحمتی

موغانلی قیز
گؤزل،
آچیق،
ال‌چاتماز.

ساچلاری
ایشیق شلاله‌سی.

ساچلاری —
زهیرلی ایلانلار
بئلینین قؤوسونه قدر اِئنیردی.

گؤزلری ماوی .

گؤیدن ده ماوی.

اللری
خیام شعرینده‌کی ساخسی.

قلبی
طاریم ناری.

دیلی
ماه‌نیشان اریکلری تک شیرین.

سینه‌سی —
قفسده‌کی
ایکی عاشیق قوش.

آه…
نه گؤزل تابلو ایدی.

قویون سورو‌لری
اونون سسینده
ایتیردی،
ایتیردی.

موغانلی قیز دئدی:

شاعر،
زنگاندان گلمیسن؟

بیچاق-بیچاق شعرلرین وار،
دیل-دیل یارالارین.

دِئ گؤروم،
یارالارینی ساتارسان؟
گؤزلریم دولدو.
گؤزلریم
بیر آن بولودلاندی.
و یاغدیم.
دئدیم:
ائی موغانلی قیز،
منیم یارالاریم
ال‌چاتمازدیر.
بؤیوکدور.
اؤمور بویو اوزانیر.

ائی گؤزل قیز،
قویارام
یارالاریمی
دیرناقلارینلا قاشییاسان.
قاشی.

بیلیرسن‌می؟
یارانین قاشینماسیندا
صاف لذت‌لر وار.

یارالاریمی قاشی.
اوزون دیرناقلارینی
یاراما باتیر.

یارا
تزه‌لنملیدیر.
چؤرک کیمی.
دوز کیمی.
یارانین حؤرمتی وار.
یارا گؤزلدیر.

یارا —
حیاتین اوزون شعریدیر.
قاشی.

قوی دیرناقلارین
اته چاتسین.
سومویه.
قان آخسین.
آراز کیمی.

تکجه قان
قانی آپارار.

قان
تورپاغین اوستونده قالماز.
قاشی یارانی.
بو خسته شعرلری
دریمین آلتیندان
چیخارت.

سومویوم آغدیر.
سویوقدور.
قار…
قار
یارانین سون حدّیدیر.

سومویوم
شعردیر.

سومویوم یانیر.
ائشیدیرسن؟
قارغانین سسینی؟
نغمه اوخویور:
…قار
قار…

#شعر
🔹
https://t.me/dusharge1