🔰
فلسفه‌نین اؤز آدامی وار
چوخلاریمیز فلسفه دئینده ساده حیاتدان قوپاریب بیزی دوشوندوروجو حیاتا آپاراجاغی اوچون اوندان قورخوروق. بلکه ده بونا گؤره اوره‌ییمیزده دئییریک: «فلسفه‌نین اؤز آدامی وار».
فلسفه‌یه قارشی گئنیش یاییلمیش احتیاطلی مناسبت، اصلینده، اونون آیدینلادیجی چتینلییندن چوخ، واراولوشسال (اگزیستانسیال) تأثیری ایله باغلی‌دیر. فلسفه عادتا مجرد آنلاییشلار، مرکّب تئرمینولوژی و نظری سیستئملرله عینی‌لشدیریلسه ده، اوندان قورخونون اساس سببی گونده‌لیک حیاتین راحات و آوتوماتیک آخیشینی پوزما پوتئنسیالی‌دیر. فلسفی دوشونجه انسانی موجود حیات فورماسی ایله اوزلشدیریر و بو اوزلشمه چوخ واخت ناراحاتلیق یارادیر.
«ساده حیات» آنلاییشی بورادا درینلیکدن محروم حیات آنلامینا گلمیر؛ داها چوخ سورغولانمادان قبول ائدیلن، عادت و وردیشلر اوزرینده قورولموش یاشام فورماسینی ایفاده ائدیر. فلسفه ایسه بو آوتوماتیک‌لییی سارسیدیر. او، انسانی نییه بئله یاشادیغی، نیبه بئله دوشوندویو و هانسی دَیرلره اساسلاندیغی سواللاری ایله اوز-اوزه قویور. بو سواللار راحاتلیق یوخ، مسؤلیت یارادیر. محض بونا گؤره فلسفه چوخ واخت تهلوکه‌لی بیر فعالیت کیمی قاورانیلیر.
«فلسفه‌نین اؤز آدامی وار» ایفاده‌سی بو قورخونون سوسیال دیلله ایفاده اولونموش فورماسی‌دیر. بو جمله فلسفه‌نی ائلیت، سئچیلمیش و گونده‌لیک حیاتدان کنار بیر مشغولیت کیمی تقدیم ائدیر. بئله‌لیکله، فرد فلسفی دوشونجه‌دن کؤنوللو شکیلده اوزاق دورور و بو اوزاق دورمانی نورماللاشدیریر. اصلینده ایسه بو موقع اینتئلئکتوال تواضعکارلیقدان چوخ، دوشونجه مسؤلیتیندن یایینما استراتئگییاسی‌دیر.
فلسفه‌نی «باشقالارینین ایشی» کیمی گؤرمک، انسانین اؤز حیاتینی سورغولاماقدان امتناع ائتمه‌سی دئمکدیر. حال‌بوکی فلسفی دوشونجه پئشه و یا آکادئمیک ایستاتوس مسئله‌سی دئییل؛ او، انسانین اؤز واراولوشو ایله قوردوغو مناسبتین فورماسی‌دیر. فلسفه خصوصی انسانلارا عاید دئییل، خصوصی جسارت طلب ائدیر: اؤیره‌شیلمیش معنالاری ریسکه آتماق جسارتی.
بو باخیمدان فلسفه‌دن قورخو پاسیو نیهیلیزمله ده علاقه‌لی‌دیر. انسان معنانین موجودلوغونو تام انکار ائتمیر، آنجاق اونون آردینجا گئتمکدن ده چکینیر. فلسفه ایسه محض بو تهلوکه‌سیز نئیتراللیغی داغیدیر. او، انسانی موقع توتماغا، سئچیم ائتمه‌یه و بو سئچیمین نتیجه‌لرینی داشیماغا مجبور ائدیر. بو مجبوریت بیر تضییق دئییل، آزادلیغین اؤزودور؛ آنجاق آزادلیق همیشه راحات اولمور.
نتیجه اعتباریله، فلسفه‌نی ساده حیاتدان قوپاران بیر تهلوکه کیمی گؤرمک، اصلینده، دوشونولمه‌میش حیاتین قورونماسی جهدی‌دیر. حال‌بوکی فلسفه حیاتدان قاچیش دئییل، حیاتین اؤزونه داها دقّتلی و مسؤلیتلی شکیلده داخیل اولماقدیر. «فلسفه‌نین اؤز آدامی وار» دئییمی ایسه بو چاغیریشا قارشی قورولموش ان سس‌سیز، آنجاق ان داواملی مدافعه مئکانیزملریندن بیری‌دیر.
همت شهبازی
#فلسفه
🚶🚶
https://t.me/dusharge1
Post #198
362
- 👍 10
- 🔥 1