⬛
یوز ایلده بو قدر انقلاب؟!

انقلاب و حرکاتلارین اساس مقصدی توپلومون قورولوشونو دییشدیرمک، ظلم و استبدادی آرادان قالدیرماقدیر. آنجاق، کوللئکتیو مقصدلر فردی احتراصلارلا توققوشدوغو زامان انقلابین نتیجه‌سی غیرمعین اولور. معاصر تاریخده باش وئرن انقلابلار زامانی فردیت‌چی روحون حاکم اولماسی، کوللئکتیو روحون داواملی‌لیغینی سارسیتمیشدیر. حاکمیتین فاجعه‌سی و حکمرانلیق احتراصی، دیگر انسانلاردان اوستون اولما ایچ‌گودوسو، همیشه فردی استبداد و مطلقیت‌چی دوشونجه‌لرین ماهیتینده اولوب و بیر شکیلده باشقالاری اوزرینده اوستونلوک الده ائتمه‌یه چالیشمیشدیر. هر کس باشقاسیندان امتیاز آلماق آرزوسوندا اولموشدور. آیدین‌دیر کی، انسانین انسان اوزرینده حاکمیتی اولمادیغی، حیسیاتلا حرکت ائتدییی و باشقاسینا حاق تانیدیغی -و حتتا بو حاق یوخدورسا، یاراتماغا چالیشدیغی- حاللاردا، قارشیلیقلی آنلاشما، دینج بیرگه‌یاشاییش، هومانیزم و دیگر بیر انسانین وارلیغینی درک ائتمه ایسته‌یی اراده‌لره حاکم اولموشدور، یوخسا زوراکی و مطلق دوشونجه‌لرین حکمرانلیغینا یئر اولمامیشدیر.

معاصر ایران تاریخینده‌کی دییشیک‌لیکلرده ده حاکم اولان وضعیتین دییشمه‌سینده بیر نوع کوللئکتیو روح اولموشدور. آنجاق انقلابلارین غلبه‌سیندن سونرا فردی ایستکلر و ذوقلر، انقلابلارین کوللئکتیو روحونو پوزموشدور. عکس حالدا، ایرانین یوز ایللیک تاریخینده بو قدر انقلاب، حرکات و قیاملار باش وئرمزدی. آخی بیر ملّتین نه قدر ائنئرژیسی و گوجو وار کی، هر دؤورده و زاما‌ندا موجود وضعیتی دییشدیرمه‌یه چالیشسین؟ بو دا گؤستریر کی، وضعیتین دییشدیریلمه‌سی کیفایت دئییل؛ بئله بیر دییشیک‌لیک، توپلومون سیستئملی بیر قورولوشا چاتماسی اوچون تک‌باشینا یئترلی اولمامیشدیر. چونکی غلبه‌دن درحال سونرا چوخلوقچو دوشونجه و روح، فردی مطلقیت‌چی دوشونجه طرفیندن آزدیریلمیشدیر.


https://t.me/dusharge1