👆👆
«دوه دوزلتمک» حکایه‌سینه کیچیک یادداشت

چؤره‌یین قوخوسوندا اوشاق اویونو

حکایه‌نی ایلک دفعه ۱۳۷۰.جی ایلده فروغ آزادی قزئتینده چاپ اولوناندا اوخوموشدوم. او واختلار حکایه منی ائله تأثیرلندیرمیشدی کی، حتتا فارسجایا دا چئویرمیشدیم. ایللر کئچسه ده، فیضه‌نین اوبرازی یادداشتیمدان سیلینمه‌دی. اوْ، ساده بیر کندلی اوْلسا دا، حیاتین چتینلیکلری قارشیسیندا اینجه بیر ذکایلا دایانان، سس‌سیز بیر قهرماندیر.

حکایه‌ده فیضه آجدیر. آما بو آجلؽغی اوشاغا حیس ائتدیرمه‌مک اۆچون گؤزل بیر بهانه تاپیر: اوشاغین خوشونا گلن اویونا قوشولور.
کندده تندیر چؤره‌یی بیشیرنده‌، چؤرک قورو چیخار. اوشاقلار او قورو چؤرکلری گؤتوروب، دیشلری ایله مختلیف حیوانلارین تصویرلرینی دۆزلده‌رک اویون اوینایارلار. بو، هم ساده بیر اوشاق اَیلنجه‌سی‌دیر، هم‌ ده کند حیاتی‌نین طبیعی بیر یارادیجیلیق فورماسی.
فیضه‌ ده همین اویونا قوشولماقلا اصلینده ایکی مقصده چاتیر: هم اوشاغا چؤرکدن حیوان (دوه) شکلی دۆزلدیر، هم‌ ده آجلیغینی گیزلیجه آرادان قالدیریر. آما اوشاغین ساده‌لؤوح سؤزو — «فیضه دئییر چؤرک وئرسن باشقا حیوان شکلی ده سنه دوزلده‌رم» — آنایا حقیقتی آچیر. آنا باشا دۆشور کی، فضه آجدیر. و چؤره‌یی اونا وئریر.

بو ساده صحنه‌، اصلینده‌، انسانین لَیاقتینی قوروماق، آجلؽغی بئله مرحمته، مهربانلیغا چئویرمک کیمی درین بیر معنانی ایفاده ائدیر.

اوستاد باریشماز بو کیچیک اوشاق اویونوندان بؤیوک بیر حیات درسی یارادیر. حکایه‌نین گوجو‌ ده محض بوندادیر:
گونده‌لیک، عادی بیر حادثه‌نین آرخاسیندا انسان وارلیغی‌نین ان اینجه‌، ان حساس قاتلارینی گؤسترمکده‌.

منیم اوچون بو حکایه تکجه اوخودوغوم بیر متن دئییل، هم‌ ده اوشاقلیغیمین قوخوسونو قایتاران بیر خاطیره‌دیر. یادیمدادیر، بیز‌ ده اوشاق اولاندا آنامؽن تندیرینین اوستونده باشقا اوشاقلارلا چؤره‌یین قوروسوندان مختلیف حیوان تصویرلری دۆزلدردیک. هر دفعه یاریشاردیق:
کیم داها گؤزل دوزلده‌جک؟
یاریشین غالبینه آنام یاخماجلی (یاغلی) چؤرک وئرردی. او یاغلی چؤرک بیزیم اوچون اوشاق اویونوندان چوخ، زحمتین، بیرلیین و پایلاشماغین سیمبولو ایدی.

بئله‌جه، بیر قورو چؤره‌یین حکایه‌سینده هم اوشاق گولوشو، هم آنا مرحمتی، هم‌ ده انسانین ان درین آجلؽغی گیزلنمیشدی.
.
✍ همت شهبازی
🦜
https://t.me/dusharge1