🦩
دوه دوزلتمک || ح.ع. باریشماز

فیضه‌گیلین دوواری‌نین اوچوغوندان فیضه‌گیله باخیرام من. فیضه گلیر منه دوغرو. أل چؤره‌ییمی اونا دوغرو اوزالدیرام. اودقونورکن ویرمیر ألین. آمما دئییر: چؤره‌ییندن وئر بیر دوه دوزلدیم من ایکی قیچلی. راضی‌لاشدیم. ایتی دیشلر ایشه دوشدو. چوخ چکمه‌دن ایری قیچلی بیر دوه‌نی منه وئردی. ائوه ساری تیزیقلاندیم. آمما فیضه هارایلادی: دایان گئتمه. هاراییندا آغیر بیر درد، رجا واردیر. آغلایان تک. آمما من ده سئوینجیمین قاباغینی بوغانمارام، آنامی دا ایسته‌ییرم سئوینجیمه اورتاق ائدم.
گرگیلنمیش تندیر ایچره یاببا کؤزو گول _گول ویریر. خینالانیر دوواریندا، کؤپوشگه‌میش آغ لاواشلار. ألیمده بیر ایکی قیچلی سیسقا دوه، پلتک دیلیم توتار توتماز، فیضه‌گیلده باش وئردیین آنلادیرام. آنام اویور. بازی چالمیر. دوداغینا بیر زهرلی گولوش قونور. پاییزلارین آخشامی‌نین ساریسی تک فیکره دالیر.
أل اوزالدیب اؤرتوک آلتدان ایکی دنه ال چؤره‌یی وئریر منه: دئنه فیضه! گؤزلری‌نین قاراسینا قوربان خالان. یئنه منه دوه دوزلت.
قاییدارکن، کیپرییندن دامان داملا، دوواق اوسته تیسیلداییر. هاراسی‌نین گؤینه‌مه‌سین بیلنمه‌دیم. قانادلاندیم فیضه‌گیله. آمما فیضه سس وئرمه.دی. پنجره‌نین قاباغیندا تورپاق اوسته سره‌لندیم. فیضه دئدیم، آغلامسیندیم. آمما داشدان سس ائشیتدیم فیضه‌دن یوخ. خیسین خیسین پنجره‌نین دالیسیندا آغلاییردی. آغلاماغین آنلاماییم، اوتدو سسین. بیر ده داها منه دوه دوزلتمه‌دی.
آغلاماغین سببینی چوخ سونرالار باشا دوشدوم. آج‌لیغین دادار اولدوم. اوره‌ییمده زوققولدایان بیر یارایا دؤندو فیضه.
آنلادیم کی أن زور ایشدیر، آجلیق اوزره چؤره ک اوسته دیشلریله بیر دوه‌نین شکلین چکمک، کریستوفون آمریکایا چاتماسیندان آغیر بیر ایش.
.
#حکایه
☘
https://t.me/dusharge1