☂
فردوسی-نظامی فورمالاشدیران
تورک ادبیاتی
(2)
تورک دیوان ادبیاتیندا، فارس ادبیاتیندان (داها چوخ فردوسی-نظامی عنعنه‌سیندن) و اسلام دینی واسطه‌سیله دینی-ایرانلی کیملیک اورتایا چیخاراق یاد بیر عنعنه یاراندی.

تورک دیوان ادبیاتیندا (هم عثمانلی، هم آذربایجان ادبیاتیندا) شاهنامه‌دن گلن افسانه‌لر (او جمله‌دن: روستم، اسفندیار، سیاووش، رخش، سهراب و س)، نظامی‌نین خمسه‌سیندن گلن ائپیک-لیریک اوبرازلار (او جمله‌دن اسکندر، شیرین، خسرو، فرهاد، مجنون، لیلی و س) گئنیش یئر آلاراق یئرلی قهرمانلار، تاریخی شخصیتلر و یئرلی موتیولره اساسلانماق اونودولدو. حکمدارلاریمیز، تورک شاعیرلرینی، لیلی-مجنون‌لار یازماغا، رسام و مینیاتوریست‌لری ایسه شاهنامه‌ و نظامی‌نین اثرلرینی تصویری جانلاندیرماغا تشویق ائتدیلر. بئله‌لیکله دیوان ادبیاتیمیز حکمدارلاریمیزلا یاناشی، شعرلرینده فردوسی-نظامی موتیولرینی انکشاف ائتدیره‌رک ادبیاتیمیزین کیملیینی ده یاد بیر کیملیکله عوض ائتدیلر. «کوراوغلو، قیرآت، شاه ختایی، بابک، اصلی-کرم، سارا و...» کیمی یئرلی تاریخی-قهرمانی و میفولوژی اوبرازلار ایسه یالنیز شیفاهی ادبیاتدا یاشادی. رسمی دیوان ادبیاتینا یول تاپمادی. دیوان ادبیاتیندا بو یئرلی اوبرازلارا اشاره ائتمک سانکی ادبیات اوچون «آشاغیلاییجی رول» داشییردی.

منجه ایلک دفعه اولاراق «ابوالقاسم نباتی»نین شعرلرینده «کوراوغلو» و دیگر یئرلی اوبرازلارین حیات ماجرالارینی دیوان ادبیاتیندا معنالاندیرما پروسئسینه داخیل ائتمه‌یه باشلادی:

گاه نباتی آدینی، گاه خان‌چوبانی سؤیله‌ین
بیر کوراوغلو وضع، بیر گزافی گؤزلر گؤزلریم

صفوی دؤوروندن اعتبارا شیعه‌چیلیک و بونون آردینجا یارانان مرثیه ادبیاتی یئرلی اوبرازلاری داها دا کؤلگه‌ده ساخلادی. دیوان ادبیاتیندا کیملیین اساس فاکتورو دینی-ایرانلی کیملیک اولدو.
.
✍همت شهبازی
#کیملیک‌قایغیسی
🦩🦩
https://t.me/dusharge1