🔰
اؤزونو تورک سایمایانلاری تورک ائد‌نلر


📌 بعضی تدقیقاتچیلارین و آنتولوگییا ترتیبچی‌لرینین (خصوصی ایله قوزئی آذربایجاندا) ماراقلی بیر وردیشی وار: عؤمرو بویو بیرجه سطیر تورکجه یازمامیش یازیچی و شاعرلری —‌مثلاً، عارف قزوینی، میرزاده عشقی، زین‌العابدین مراغه‌ای، طالبوف تبریزی، پروین اعتصامی، جعفر خامنه‌ای و باشقالارینی‌— زورلا آذربایجان ادبیاتینا داخیل ائتمه‌یه چالیشیرلار.
اصلینده، بو شخصلرین هئچ بیری اؤزلرینی تورک ادبیاتینا عاید حیس ائتمه‌ییبلر. عکسینه، اونلارین تورک دیلی و کیملییی ایله ضدیت‌لی مناسبتده اولدوقلاری دا معلومدور.
مثلاً، عارف قزوینی واختیله محمدامین رسول‌زاده، علی‌بی حسین‌زاده و روشنی بی کیمی تورک آیدینلارینا قارشی چیخاراق تبریزده کونسئرتلر تشکیل ائدیب. بو کونسئرتلرین اساس شعاری تورک کیملیینه قارشی اولماق ایدی. بئله‌لیکله، او، آچیق شکیلده تورکلویه قارشی اولدوغونو نماییش ائتدیریردی.
بس بیز نییه بو جور شخصلری ادبیاتیمیزا داخیل ائدیب وطن‌سئور کیمی تقدیم ائتمه‌یه چالیشیریق؟ بو یاناشما، اونلارین چاغداشی اولان و اثرلرینی تورکجه یازاراق بونا گؤره غرور دویان معجز شبسترلی کیمی شاعرلرین حاققینی تاپدالامیرمی؟

بو موضوع داها دا درینه گئدیر.

گونوموزده گونئی آذربایجاندا دا بیر سیرا اؤزلرینی بیزدن سایمایان شاعرلری، یازیچیلاری، ایدمانچیلاری، اویونچولاری و ایش آداملارینی زورلا «اؤزوموزدن بیری» کیمی گؤسترمک ایسته‌ییریک. حال‌بوکی اونلارین بیزیم حیاتیمیزا ماراغی یوخدور. بیز ایسه، دَریدن-قابیقدان چیخاراق، اونلارین تورک اولدوقلارینی ثبوت ائتمک اوچون ائولریندن توتموش شخصی سندلرینه قدر معلومات توپلاییب یاییریق. ماراقلی‌دیر، دوغما دیلی و مدنیتینه ایللرله صداقتله خدمت ائد‌ن سویداشلاریمیز اوچون ده بو قدر جانفشانلیق ائدیریک‌می؟

✍️ همت شهبازی

📖 #یادداش

https://t.me/dusharge1
☘️