🪴
گونلردن ۱۲ شهریور گونو
بئله بیر گونده -۳ سئنتیابر ۱۹۴۵.جی ایلده- آذربایجان ملی دئموکرات فرقه‌سی‌نین بیاننامه‌سی یاییملاندی. بو باره‌ده سید جعفر پیشه‌وری‌نین آذربایجان قزئتی‌نین ۱۴ شهریور تاریخلی (۱.جی سایی) «فرقه‌میز ایشه باشلادی» آدلی یازیسیندان اؤیره‌نیریک. بللی اولور کی، بیاننامه ایکی گون اول یاییملانیب.
بیاناتدا اساس مقصد مشروطه قانونونون علاوه‌سی اولان «ایالتی - ولایتی انجمنلری»نین قورولماسی و ایرانین بوتون بؤلگه‌لرینده یئرلی اؤزونو اداره‌نین تأمین اولونماسی ایدی. فرقه، ایرانین استقلالینی پوزمادان اؤز مدنی حاقلارینی طلب ائدیردی.
پیشه‌وری یازیر:
«بیز ایرانین استقلالینه علاقه‌دار اولدیغیمیز ایله برابر آذربایجان خلقینون فرهنگی (مدنی) اختیاراتی و اؤز مقدراتینین اؤز گوجی ایله تعیین ائتمه‌سینی آرزو ائدیریک. بیز اؤز دیلیمیزده فرهنگ (مدنیت) بهداشت (صحیه) و دولت اداره‌سی طلب ائدیریک، اؤز دیلیمیزده کیتابیمیز، روزنامه‌میز و ادبیاتیمیز آزاد بیر صورتده وجوده گلمک ایله خلقیمیزون مترقی بیر خلق اولماسینه امکان وئریلمه‌لیدیر».
پیشه‌وری سول گؤروشلو بیری اولسا دا، آچیق شکیلده بیلدیریردی کی:
«فرقه‌میز ملی بیر فرقه اولدیغی ایچون صینیف و طبقه نظرده توتماییب عموم جمعیتی اؤز بایداغی [بایراغی] آلتینه چاغیریر.»
او، بو فیکرینه صادق قالدی. دئیه بیلرم کی، پیشه‌وری آذربایجانین ان ملی سولچوسودور. چونکی بو گون بشریتین انسان حاقلاری کنوانسییاسیندا ایر‌ه‌لی سوردویو حقوقلارین چوخونو او، ایللر اؤنجه ایر‌ه‌لی سورموشدو.
پیشه‌ورینی سولچو اولدوغونا گؤره، یالنیز سووئت-کومونیست باخیشی ایله دَیرلندیرمک دوغرو دئییل. بو گون پیشه‌وری‌نین گؤردویو ایشلری هانسی ملتچی و یا سولچو گؤروب؟
سوال بودور:
«بو گون بیز هانسی آرزونو گئرچکلشدیرمیشیک کی، پیشه‌وری اونو واختیندا ائتمه‌میش اولسون؟»
بو سوالین جاوابی اونون بؤیوکلویونون ثبوتودور.
✍️همت شهبازی
موغان، ۳.۹.۲۰۲۲ / ۱۲ شهریور ۱۴۰۱
☘️
https://telegram.me/dusharge1
🪑
Post #109
327