⬆️📚
کارامازوف قارداشلاری

ایلک دفعه تخمیناً ۱۳۷۱.جی ایلده «کارامازوف قارداشلاری» رومانینی اوخودوقدان سونرا دوستلاریمدان بیری ایله بو حاقدا صحبت ائدیردیک. دوستوم مندن سوروشدو: بو روماندا هانسی اوبرازی داها چوخ سئودین؟ هانسی اوبرازین دوشونجه و داورانیشی سنین دوشونجه‌نه داها چوخ اویغون گلیر؟ من او زامان گنجلیین تأثیری ایله جاوابا آرا وئرمه‌دن دئدیم کی، آلیوشا کارامازوفو سئویرم. او، دیگر قارداشلار کیمی نه قاتیلدیر، نه ده دین‌سیز.

آلیوشا، کارامازوف قارداشلاری ایچینده توپلوما ضد بیر اوبراز دئییل. کیلسایا گئدیر، الهی و معنوی داورانیشلاری وار. دیمیتری کارامازوف کیمی قاتل، یا دا ایوان کارامازوف کیمی دیندن دؤنموش، تامامیله آتئیست دوشونجه‌لی بیری دئییل. اما دیمیتری قدر ده حیاتدا گئدن اخلاقی، اجتماعی و دینی مسئله‌لره لاقئید یاناشمیر. بو موضوعلار اونو دوشوندورور. ایوانلا مقایسه‌ده ایسه داها ساده دوشونور، حتتا بیر سیرا دینی آیینلری ده عادت و عنعنه اوزرینه یئرینه یئتیریر.

اصلینده رومانین ان فلسفی بؤلومو و عمومی‌لیکده داستایوفسکی‌نین دونیاگؤروشو اؤز ایفاده‌سینی آلیوشا ایله ایوان آراسینداکی مباحثه‌لرده تاپیر. بیر-بیرینه تام ضد اولان بو ایکی قارداش حیاتین فلسفی آنلاملارینی، دینی باخیشلاری، حتتا تانرینین وارلیغینی بئله دارتیشیرلار. رومانین گئدیشاتیندا داستایوفسکی‌ اوخوجونو آلیوشانی سئومه‌یه یؤنلندیریر. منیم ده دوستوما وئردییم ایلک جاواب اصلینده داستایوفسکی‌نین بو یؤنلندیریجی باجاریغینین تأثیری ایدی.
اما آلیوشایا اولان اینانجیم اوزون سورمه‌دی. من باشا دوشدوم کی، داستایوفسکی‌ آلیوشانی نئجه دئیرلر، بیر «قاراچوخا» کیمی استفاده ائدیر. اونو اوخوجو اوچون اوجالدیر،مقدس‌لشدیریر. بیر اوجاق ائدیر. اما اصل مقصدی آلیوشانین تجرید اولونموش اخلاق ماسکاسینین آرخاسیندا کؤهنه و گئریده قالمیش دوشونجه قالیقلارینی گؤسترمک ایمیش. حقیقتده ایسه داستایوفسکی‌ اؤز موقعینی ایوان کارامازوفون آیدینلادیجی دوشونجه‌لری واسطه‌سیله ایر‌لی سورور. اوخوجونو ایسه اولجه آلداتماق اوچون آلیوشایا باغلاییب. من ده ایلک آندا اونون تأثیرینه دوشموشدوم.

اثری آنا دیلیمیزده اوخوماغین ایسه باشقا لذتی وار. بو شانسی بیزه نصیب ائتدییی اوچون #رحیم‌خیاوی جنابلارینا منتدارام.

همت شهبازی

#کیتاب

https://telegram.me/dusharge1
🪑