🪴
شعر: هادی قاراچای

داغلاردا سئيرك ياغيش تؤكوردو بيز دوغولاندا
قوردلار اولاشيردي
آتلار كيشنه‌شيردي
تورپاق دوغور كيمي آه چكيردي بيز دوغولاندا
سونرا دينجه‌ليردي
يئريیندن دوشموش قادين كيمي
بلكه گونش باتيدان دوغورموش اوندا
تورپاق دالغا وورورموش د‌نيز كيمي
د‌نيز سينه گريرميش تورپاق كيمي
قيلينج‌لار دانيشيرميش
كيشي‌لر سوسورموش
آه يازيقلار قيسير تورپاغا، قورو داغلارا
دوغولوروق
چيين‌لريميزده يوز ايلليك‌لرين يوكو
بيلک‌لريميزده قوللوق قاندالي
اور‌ك‌لريميزده ائل ياراسي و ديل ياراسي
دوعالارين ملحم قوخوسو يارالاريميزدا
تبريزين دولانبادولان كوچه‌لريند‌ن چيخيريق
اَركين قيزيل كؤينه‌يي اَينيميزده
گؤي مچيدين تانري قوخوسونا بورونوروك
يول دؤيوروك
گؤزلويور يولوموزو دار آغاجلاري
اوجاليريق
اوجالديقجا ياخينلاشير باشيميز صابينلي كنديرلره
هئي‌… يئتيم اولدوزلارين آناسي
بير داها باتيدان چيخديغين اولمازمي؟
بير داها داغلارا سئير‌ك ياغيش ياغمازمي؟
گبه تورپاق آه چكمزمي بير داها؟
آه يازيق قيسير تورپاق، قورو داغلارا
اَن ياشليميز آنا قارنيندا ياشايانلاردير
ان اوجا قالخانيميز كندير بويونجا قالخانلار


🌷بئله‌جه ۵۸ یاشا دولدون سئوگیلی دوستوم #هادی‌قاراچای

https://telegram.me/dusharge1
☘️