Вугляводы запаволілі мэтабалізм мышэй нават безь пераяданьня

Вугляводы складаюць аснову рацыёну большасьці людзей у сьвеце, аднак роля гэтых рэчываў у разьвіцьці атлусьценьня дасьледавалася значна менш, чым роля тых жа тлушчоў. Новае дасьледаваньне японскіх навукоўцаў паказвае, што вугляводы могуць уплываць на харчовыя паводзіны й мэтабалізм. І справа тут не ў калёрыях.

У досьледах мышэй падзялілі на некалькі груп і прапаноўвалі ім звычайны корм разам з дадатковымі крыніцамі вугляводаў: хлебам, пшанічнай і рысавай мукой. Аказалася, што грызуны выразна аддавалі перавагу такім вугляводным дадаткам. З часам яны ўвогуле пераставалі есьці стандартны корм. Пры гэтым назіралася павелічэньне масы цела і абʼёму тлушчавай тканкі, хоць агульная калярыйнасьць рацыёну не зьмянялася істотна. Падобны эфэкт назіраўся ва ўсіх групах, а гэта значыць, што справа не ў канкрэтным прадукце, а ў саміх вугляводах і іхняй прывабнасьці.

Далейшы аналіз паказаў, што набор вагі адбываўся не празь пераяданьне, а празь зьніжэньне энэргетычных выдаткаў арганізму. У жывёл таксама зьмяніўся склад крыві: павялічыўся ўзровень тлустых кіслот і зьніжалася канцэнтрацыя некаторых амінакіслот. Таксама ў печані назапашваўся тлушч і актывоўваліся гены, зьвязаныя зь ягоным сынтэзам. Калі мышэй пазбаўлялі вугляводных дадаткаў, усе паказьнікі хутка вярталіся да нормы.

Аўтары мяркуюць, што цяга да вугляводаў можа сама па сабе ўплываць на абмен рэчываў і спрыяць набору вагі нават бязь лішніх калёрыяў. Пры гэтым не ідзецца пра поўную адмову ад хлеба ці рысу, хутчэй пра важнасьць балянсу й камбінацыі прадуктаў. У будучыні дасьледчая каманда плянуе спраўдзіць падобныя эфэкты на людзях.