Bojxona qo‘mitasining Xitoydagi rasmiy vakili K.Kadirov “2026 Conference on Animal Welfare in the Sustainable Agri-Food Systems” xalqaro konferensiyasi doirasida tashkil etilgan panel muhokamasida ishtirok etdi.
Tadbirda xalqaro tashkilotlar, xorijiy davlatlarning diplomatik vakolatxonalari, davlat idoralari, ilmiy muassasalar hamda ishbilarmon doiralar vakillari qatnashdi.
“Barqaror qishloq xo‘jaligi va oziq-ovqat sanoatining kelgusidagi o‘sish imkoniyatlari” mavzusidagi panel muhokamasida O‘zbekiston vakili mamlakatimizning Xitoy bilan qishloq xo‘jaligi va oziq-ovqat mahsulotlari savdosi sohasidagi hamkorligini kengaytirish istiqbollari, o‘zaro savdo hajmini oshirish hamda investitsiyalarni jalb etish imkoniyatlari haqida so‘z yuritdi.
Shuningdek, qishloq xo‘jaligi va oziq-ovqat mahsulotlarining xalqaro savdosida import va eksport talablariga rioya etish, sertifikatlashtirish tizimini takomillashtirish hamda logistika jarayonlarini samarali tashkil etishning ahamiyati ta’kidlandi.
Qayd etilganidek, ushbu yo‘nalishlarda samarali hamkorlikni yo‘lga qo‘yish bojxona nazorati va rasmiylashtiruvi jarayonlarini takomillashtirish, tovarlarning transchegaraviy harakatini jadallashtirish hamda tashqi savdo tartib-taomillarini soddalashtirishda muhim ahamiyat kasb etadi.
Xalqaro konferensiya doirasidagi muloqot qishloq xo‘jaligi va oziq-ovqat mahsulotlari savdosini rivojlantirish, o‘zaro manfaatli hamkorlikni mustahkamlash hamda ushbu sohalarda mavjud imkoniyatlardan samarali foydalanish masalalarini muhokama qilish uchun muhim maydon bo‘ldi.