“Sirdaryo” chegara bojxona postida “Ochiq eshiklar kuni” tashkil etildi
O‘zbekiston Yoshlar ittifoqi Sirdaryo viloyati Kengashi bilan hamkorlikda tashkil etilgan tadbir davomida yoshlar chegara bojxona posti faoliyati, bojxona nazorati jarayonlari hamda sohada qo‘llanilayotgan zamonaviy texnologiyalar bilan yaqindan tanishish imkoniga ega bo‘ldilar.
Xususan, yo‘lovchilar va fuqarolar uchun yaratilgan qulayliklar, nazorat jarayonlarida foydalanilayotgan zamonaviy texnik vositalar va raqamlashtirilgan bojxona tizimlari namoyish etildi.
Shuningdek, zamonaviy “Z-Portal” inspeksion ko‘rik majmuasining ishlash imkoniyatlari ko‘rsatilib, uning bojxona nazoratida tezkorlik va xavfsizlikni ta’minlashdagi ahamiyati tushuntirildi. Xizmat itlari ishtirokida tashkil etilgan maxsus ko‘rgazmali chiqishlar esa yoshlarning alohida qiziqishiga sabab bo‘ldi.
Muloqot davomida o‘quvchilarga bojxona organlarida xizmatni o‘tash tartibi, sohada mavjud kasbiy imkoniyatlar, xodimlar uchun yaratilgan shart-sharoitlar hamda kelajakda bojxonachi bo‘lish istagidagi yoshlar uchun zarur talablar haqida batafsil ma’lumot berildi. O‘quvchilarni qiziqtirgan savollarga mas’ullar tomonidan atroflicha javob qaytarildi.
Bunday tadbirlar yoshlarning bojxona haqidagi bilim va tasavvurlarini kengaytirish, ularni vatanparvarlik ruhida tarbiyalash hamda kelajak kasbini tanlashda to‘g‘ri yo‘nalish olishlariga ko‘maklashishga xizmat qiladi.