Sirdaryo viloyati bojxona boshqarmasi boshlig‘i N.Salimjonov Yangiyer shahrida faoliyat boshlayotgan “Zhongya Anruixin Steel Group” MChJ mas’ullari bilan uchrashdi
Uchrashuvda umumiy qiymati 260 million AQSh dollariga teng investitsiya loyihasini amalga oshirish, korxonada metall mahsulotlari ishlab chiqarishni yo‘lga qo‘yish hamda tashqi iqtisodiy faoliyatni samarali tashkil etish masalalari muhokama qilindi.
Loyiha doirasida A400S va A500S rusumli armatura po‘lati, qurilish simlari, yumaloq po‘lat hamda boshqa metall mahsulotlarini ishlab chiqarish rejalashtirilgan.
Muloqot davomida investitsiya loyihasini amalga oshirishda bojxona organlari tomonidan ko‘rsatiladigan amaliy yordam, import qilinadigan xomashyo va ishlab chiqarish uskunalarini bojxona rasmiylashtiruvidan o‘tkazish, shuningdek, bojxona qonunchiligi talablari va bojxona tartib-taomillari yuzasidan batafsil tushuntirishlar berildi.
Uchrashuvda korxona vakillarining savollariga batafsil javoblar qaytarilib, bojxona qonunchiligi talablariga rioya qilish va tovarlarni rasmiylashtirishda belgilangan tartiblarga amal qilish yuzasidan amaliy tavsiyalar berildi.
Bunday uchrashuvlar investitsiya loyihalarini samarali amalga oshirish, tadbirkorlik subyektlarini qo‘llab-quvvatlash hamda bojxona organlari bilan ishbilarmonlik hamkorligini yanada mustahkamlashga xizmat qiladi.