Oliy Majlis Senatida bojxona sohasidagi huquqbuzarliklarga qarshi kurashish mexanizmlarini takomillashtirishga qaratilgan Qonun muhokama etildi

Unda Senatning Mudofaa va xavfsizlik masalalari qoʻmitasi raisi K.Burxanov, senatorlar, Bojxona qoʻmitasi Raisi oʻrinbosari O.Choriyev, huquqni muhofaza qiluvchi organlar hamda ommaviy axborot vositalari vakillari ishtirok etishdi.

Tadbir davomida Bojxona qoʻmitasi Raisi oʻrinbosari O.Choriyev soʻzga chiqib, Qonunning mazmun-mohiyati, unda nazarda tutilgan oʻzgartishlar va ularning amaliyotdagi ahamiyati yuzasidan senatorlar hamda ishtirokchilarga batafsil maʼlumot berdi.

Qonun bilan, avvalo, bojxona bojlarini toʻlashdan boʻyin tovlash holatlariga nisbatan jinoiy-huquqiy taʼsir choralarini qoʻllashning huquqiy asoslarini kengaytirish taklif etildi. Jumladan, Jinoyat kodeksining 184-moddasiga tegishli oʻzgartish kiritish orqali bojxona bojlarini toʻlashdan boʻyin tovlash bilan bogʻliq qilmishlarni ham mazkur jinoyat tarkibi doirasida qamrab olish nazarda tutilgan.

Shuningdek, Qonundagi yana bir muhim yangilik koʻp miqdordagi pirotexnika buyumlarini bojxona chegarasi orqali noqonuniy olib oʻtish bilan bogʻliq jinoyat ishlariga taalluqli boʻldi. Unga koʻra, Jinoyat kodeksining 250¹-moddasi ikkinchi qismida nazarda tutilgan mazkur jinoyatlar boʻyicha bojxona organlariga surishtiruv oʻtkazish vakolatini berish taklifi ilgari surildi. Bunday yondashuv bojxona organlarining sohaga oid amaliy tajribasidan samarali foydalanish, jinoyat ishlarini yuritish jarayonlarini soddalashtirish va dastlabki tergov organlari zimmasidagi yuklamani kamaytirish imkonini beradi.

Qonun muhokamasi davomida senatorlar tomonidan bildirilgan fikr-mulohazalar va takliflar koʻrib chiqilib, yuzaga kelgan savollarga Bojxona qoʻmitasi mutaxassislari batafsil maʼlumotlar berishdi.

Muhokamalar yakunida Qonun senatorlar tomonidan bir ovozdan qoʻllab-quvvatlandi.