#bojxonachi_tadbirkor_tayanchi

Bojxona qoʻmitasida metall quvurlarni ishlab chiqaruvchi va import qiluvchi tadbirkorlar hamda nazorat organlari vakillari ishtirokida uchrashuv oʻtkazildi

Uchrashuvda Bojxona qoʻmitasi Raisi oʻrinbosari N. Musamuxamedov ishtirok etib, import qilinayotgan metall quvurlarni bojxonada toʻgʻri tasniflash, ularning sifati va xavfsizligini taʼminlash masalalari muhokama qilindi.

Shuningdek, masʼullar ayrim metall quvurlarni bojxonada tasniflash bilan bogʻliq holatlarga eʼtibor qaratishdi. Quvurlarni toʻgʻri tasniflash bojxona toʻlovlarini toʻgʻri hisoblash va mamlakatga sifatli mahsulotlar kirib kelishini taʼminlashda muhim ekani taʼkidlandi.

Ayniqsa, gaz, neft va issiqlik tarmoqlarida ishlatiladigan quvurlarning sifati va xavfsizligi muhim ahamiyatga ega. Shu bois, uchrashuvda metall quvurlarni sertifikatlash, import boj stavkalarini muvofiqlashtirish, mahsulotlar sifati va xavfsizligini taʼminlash hamda bojxonada ularni toʻgʻri tasniflash tartibini takomillashtirish boʻyicha takliflar ilgari surildi.

Tadbirkorlarga ushbu yoʻnalish boʻyicha oʻzlarini qiziqtirgan savollarga tushuntirishlar berilib, taklif va mulohazalari tinglandi.