🍎🏃📚✏️
⭕️ خزنه حامام، چیڲ کرپیج، بیرده فوتبال توْپو
✍️ یازان: #اسفهلانلی ح.حسنپور (دۆزه قوْل)
آخشاملار خالێ توْخوماقدان ال چکندن سوْنرا توْپو الینده ساخلایێـب، اوشاقلارا پوْز وئرردی.
بیر گۆن آخشام‌چاغێ گؤردۆم علی، توْپ الینده گلیر منه سارێ! دئدیم:
- علی! توْپووو وئررسن منده بیر باخێم. تکجه بیر تپیک ووراندان سوْنرا گئنه وئریم اؤزۆوه؟
علی دئدی:
- آخێ برک وورارسان گئدر اوزاغا!
دئدیم:
- یوْخ! یاواش وورارام اوزاغا گئتمز.
علی، توْپو وئردی. منده بیر تپیک ووردوم، توْپ گئتدی دۆشدو حامامدان گلن سویون حوضچه‌‌سینه! بیر آندا یئل ووردو توْپو آپاردێ حامامێن سویو گلن کۆرهنین لاپ دیبینه...
ایکی الیمیز اوْلدو، بیر تپه‌میز!
حامامدان گلن سویون قوْخوسو بیر یاندان، کیفیرلیـغی بیر یاندان، گؤز ده کۆرهنین ایچین گؤرمۆر! قالدێـق آوارا گوْر.
علی، باشلادێ توْپون اوْن‌ایکی تۆمن پولون ایسته‌مڲـه. دئدی:
- توْپو سن ووردون گئتدی. پولونو وئرمه‌لی‌سن.
دئدیم:
- منه نه؟ سن، وئرمه‌‌سه‌یدین منده وورمازدێم.
سؤز اوزاندێ. علی گئتدی آتامێن اۆستونه شکایته! آتام، گلیب سویا باخدێ، هئچ بیرزاد گؤرمه‌دی.
نهایت آتام، علی‌نی دیله توتوب، دئدی:
- اوْغول بالا! نیگران اوْلما، صاباح سحر حامام آچێـلاندا، سو توْپو گتیرر دێـشاری، گئدیب گؤتۆرریک. توْپ گلمه‌سه ده، یا پولون، یا دا تازاسێن آلێب وئره‌ریک.
آمّا توْپون کۆره‌دن چێخماسی اوْن گۆندن چوْخ زامان آپاردێ، توْپدان خبر اوْلمادێ.
آتامێن کندده باققال اوْلدوغونا گؤره، علینین ده آتا – آناسێ، آتام‌دان نسیه جنس آلماقلارێـنا خاطیر ایش چکیش – برکیشه چکمه‌دی.
آتامێن ایشی گۆجو اوْلدو هر یارێم ساعاتدان سویا باخماق! علینین ده ایشی هر گۆن توْپون سوْراغێـن توتماق!
بیر گۆن سحرچاغێ آتام الینده رنگی دڲیشیلمیش توْپ ایله ائوه گلیب، چوْخ سؤزدن سوْنرا «توْپو تاپدێـم.» - دئدی.
آتام توْپو «علی»یه وئریب، دئدی:
- بیر داها منیم اوْغلوما توْپ وئرسن، اؤزۆن بیلرسن ها، منه ربطی یوْخدو.
حامام سوْن زامانلاردا تأسفله لوله حامامێ اوْلدو. ایندی تعطیل حالێندا و میراث فرهنگی اداره‌سی صاحیب اوْلوب.
#سون
╭•••••••••••••••••••••• ••••••••••╮
╰➤@chgrmn
#تورکجه_دانیش_ائلنن_باریش
#تورکجه_یازاق_ائلنن_قالاق
#کیملیییمیزه_بیرگه_دالاق
╰••••••••••••••••••••••••••••••••╯
Post #5181
25
- ❤ 1