"Xavfsiz hudud — dolzarb 30 kunlik" oyligi doirasida Buxoro viloyati IIB huzuridagi Qo‘riqlash xizmati xodimlari tomonidan aholi o‘rtasida keng qamrovli targ‘ibot-tashviqot ishlari olib borildi. Ushbu tadbirdan ko'zlangan asosiy maqsad — hududlarda xavfsizlikni ta’minlash, fuqarolarning mol-mulkini ishonchli himoya qilish va huquqbuzarliklarning barvaqt oldini olishdir.

Muloqotlar davomida fuqarolarga Qo‘riqlash xizmati faoliyatining asosiy yo‘nalishlari va afzalliklari tushuntirildi. Xususan, xonadonlar, savdo va xizmat ko‘rsatish shoxobchalari hamda boshqa turdagi obyektlarni ishonchli qo‘riqlash imkoniyatlari haqida batafsil ma’lumotlar berildi.

Shuningdek, mutaxassislar tomonidan aholiga zamonaviy texnik qo‘riqlash vositalaridan samarali foydalanish, shaxsiy xavfsizlik choralarini kuchaytirish, shubhali holatlarga befarq bo‘lmaslik hamda turli jinoyatlarning oldini olish yuzasidan kerakli tavsiya va maslahatlar taqdim etildi.