Рэдактар Радыё Свабода ў Еўропе Рыкард Юзьвяк адказаў на пытанні «Белсату» пра сённяшнія адносіны Еўропы з рэжымам Лукашэнкі:
«Паляпшэнне адносінаў – гэта вельмі аптымістычны погляд на рэчы. Праўда, ёсць пэўнае адчуванне, што Беларусь можа быць гатовая крыху зрушыцца.
Аднак шмат ключавых краінаў вакол Беларусі (Літва, Польшча і іншыя) па-ранейшаму надзвычай скептычна ставяцца да шчырасці Лукашэнкі».
Эксперт называе паводзіны Лукашэнкі «класічным беларускім танга».
«Гэта калі вы крыху ідзяце налева, крыху на Захад і гэтак далей. Таму гэты крок, я думаю, хутчэй ёсць больш адчайнаю спробаю Менску не быць уцягнутым у патэнцыйны канфлікт паміж NATO і Расеяй. Вось як я гэта чую і як бачу з таго, што чую ў Бруселі».
Рыкард Юзьвяк таксама адказаў на пытанне, як Лукашэнку аддаліцца ад Пуціна.
«Думаю, гэта самае простае: яму трэба паказаць палітыку, незалежную ад спадара Пуціна. Я ведаю, што ён спрабуе, але ўрэшце дапамагло б не ствараць гэтыя гібрыдныя пагрозы на межах Літвы, Латвіі і Польшчы і вызваліць палітычных зняволеных. Гэта былі б відавочныя сігналы таго, што ён настроены сур’ёзна. Пакуль што гэта крыху фарс».