Хәерле иртә, хөрмәтле укучыларыбыз! Бүгенге кайбер хәбәрләрне барлыйк:

🔸Татарстанда һәм Башкортстанда дроннар һөҗүме куркынычы игълан ителде. Һава аланнары вакытлыча ябылды. "Аспекты" язуынча, Башкортстанда шаһитлар Дим күгендә очкыч тибындагы дронның шәһәр ягына очуын күргән. Төньяк сәнәгать зонасы янында ким дигәндә дүрт шартлау тавышы ишетелгән. Басма мәгълүматынча, дроннарның берсен «Башнефть-УНПЗ» өстендә бәреп төшергәннәр. Кайбер урыннарда сирена тавышлары яңгыраган. «Новойл» корылмасы районында төтен күтәрелә.

🔸Самарда Wildberries келәтенә дроннар һөҗүм иткән, нәтиҗәдә янгын чыккан. Зыян күрүчеләр турында хәбәр ителми.

🔸Сарытауда һөҗүм нефть эшкәртү корылмасына ясалган. Өлкәнең Энгельс шәһәрендә дронның күпкатлы йортка бәрелүе нәтиҗәсендә ике кеше һәлак булган. Бу хакта губернатор Роман Бусаргин хәбәр итте.

🔸Русиянең террорга каршы комитеты кичә Мәскәүдәге Balzi Rossi ресторанындагы шартлауны теракт дип атады. Оешма белдерүенчә, һәлак булган өч кешенең берсе — ресторанга шартлаткыч алып керергә тырышкан хатын-кыз, икенчесе аны кертмәгән сакчы һәм өченчесе — ресторан кунагы. РЕН ТВ һәлак булучылар бишәү дип белдерә. Тагын алты кеше авыр хәлдә.

@azatliqradiosi