Хәерле иртә, хөрмәтле укучыларыбыз! Бүген 9 июль, әлеге сәгатькә булган кайбер хәбәрләрне барлыйк:

🔹 Украина дроннары Ставрополь краендагы һәм Тверь шәһәрендәге нефть базаларына һөҗүм иткән. Объектларда янгын чыккан. Шулай ук Таганрог култыгында дрон ике нефть танкерына һөҗүм иткән.

🔹 Херсон өлкәсенең Русия басып алган өлешендә электр тәэминәте өзелгән.

🔹 Парижда Павел Дуровтан Telegram аша кылынган җинаятьләр турындагы эш кысаларында дүртенче тапкыр сорау алганнар.

🔹 АКШ Иранга янә һөҗүмнәр башлаган. Хәрбиләр операциянең максаты итеп Һормуз бугазы аша диңгез юллары иминлеген тәэмин итүне атаган. Иранның Ислам инкыйлабы сакчылары корпусы исә АКШның Күвәйт һәм Бәһрәйндәге хәрби базаларына һөҗүм иткән.

🔹 Псков һәм Әстерхан өлкәләрендә бензинны машинаның дәүләт номерларына карап сата башлаячаклар.