ادبیات سئونلر

باش ساغلیغی،
آلدیغیمیز آجی خبر اساسیندا ادبیات سئونلرین زلزله سیتادینین تانینمیش اویه سی رضا قلندزاده جنابلارینین  مهریبان آتاسی حیاتا گوز یومدو ادبیات سئونلر بو عزیز آتانین ابدی خاطیره سینه عشق اولسون دئیره ک  قلندرزاده عایله لرینه باش ساغلیغی وئریر.
آرتیرمالییق بو آتانین توپراغا تاپیشیرما مراسیمی بوگون ساعات اوندا تبریزده وادی رحمت مزارلیغیندان اولاجاق.
ادبیات سئونلر 1405/4/22

https://t.me/Adabiyyatsevanlar

زرین رزندی(طناز)

فلک بئله یازدی،ایش بئله گلدی
سن منی ایسته مه،ایسته رم سنی
سئودامیز نظره،دیش-دیله گلدی
سن منی ایسته مه،ایسته رم سنی

دوشدوم ایاغینا،سوروندو کوُنلوم
گوُزلرینه دوشدو،اشتها مئیلیم
باشقاسینا یئریکله مز کی گوُیلوم
سن منی ایسته مه،ایسته رم سنی

نبضیم سن،نفسیم،داماریمدا قان
قارانلیق گئجه مده،پاریلدایان دان
اورک ده پارتلایان،آتوم سان،وولقان
سن منی ایسته مه،ایسته رم سنی

سن ایله یاشاییب،سن ایله اوُلمک
رئال دیر؟گئرچک دیر؟خیال دیر؟گوُیچک
دیسکینیر دویغولار،کوُلگه وی گوُرجک
سن منی ایسته مه،ایسته رم سنی

باخیشیم آسیلی قالدی دالینجا
نه لر چکدیم سنی یولا سالینجا
ظولمته بویاندیم،یالنیز قالینجا
سن منی ایسته مه،ایسته رم سنی

سن آللاه پایی سان،گوُزل وئرگی سن
بولماجاسان؟یوخسا آغیر بیلگیسن؟
نه ایسه سئوگی،سئوگی،سئوگی،سئوگی سن
سن منی ایسته مه،ایسته رم سنی.


https://t.me/Adabiyyatsevanlar

رسول جوادی

سویروشدو آیاغیم، باخدی دالیمجاق
کوهنه قالوشلاریم، ایریزین باشماق
یار یولداش یوگوردو من آیاق یالین
اولارمی گَدیگی بئله ده آشماق؟

َآچیلدی پئتاوام قیریلدی ایپی
نیمداش شالواریمین سوکولدو زیپی
دئییللر تقدیردی چکیر کیلیپی
اولارمی اونلاندا دوروب ساواشماق؟

پیرتدادی شه له مین، آیاق - باشلاری
تورتوکونتو گزدیم یال یاماشلاری
یاناجاقسیز قالدی اوجاق داشلاری
اولارمی یاشامدان، بیر سونا قاشماق؟

یازیلیب یاشامدا بو یازی بیزه
وئریلیب بو کیتاب، سول الیمیزه
یازان بئله یازیب طالعیمیزه
یاماخلی شالوار گئ ، ایریزین باشماق!


https://t.me/Adabiyyatsevanlar

حیدر بابایی

قوشما

توتولسا گوزلریم اییلسه بئلیم
تیتره سه اللریم آغارسا تئلیم
یئنه ده سسلیرم سنی من، گولوم
بیر اوشاق یاشاییر ایچیمده،هله
....
گوزوم یولدا یاشیل باهار گوزله ییر
اورمان خیالیمدا چینار گوزله ییر
کوراوغلو دویغومدا نیگار گوزله ییر
بیر کاروان آرزوسو کوچومده،هله
....
سینادیق دوشمانین دوستون نئچه سین
آختاردیق گونشی تاپدیق گئجه سین
گلیب گزنمه دیک سئوگی کوچه سین
گئجه نین زنحیری قیچیمدا، هله
......
ایسته دیم قوش اولاق بورادان اوچاق
آیریلمیر یارامدان بو قانلی پیچاق
دئدیم بوسئودایا گوز یوماق گئچک
دئییرسن اللرین ساچیمدا، هله


https://t.me/Adabiyyatsevanlar

کیتاب تانیتیمی

«مارادونا»

#حیکایه_توپلوسو
#رضا_حسینی_مرند
ویراستار: علی موسی‌زاده

مشخصات: ۷۷ ص؛ رقعی؛ قیمت: ۲۴۰

حکایه‌لر:

۱. قارا دویون
۲. حکایه‌لریمده همیشه قار یاغیر
۳. تابلو
۴. مارادونا
۵. دلی زینب

علی موسی‌زاده و بابک مینقی‌دن اؤزل تشکورومو بیلدیریرم. کتابی آنلاین شکیلده #کیرپی اینیستا پئیجیندن الده ائده بیلرسینیز...

Narration by: امیر صادقی

Book Trailer by: مهدیه مکانی، جواد حسینی



#حیکایه_توپلوسو #کیرپی #صباحی_درنه‌یی #داستان

https://t.me/Adabiyyatsevanlar

سحر_خیاوی

سوکوتون سسی!!

اوزولمه یولداشیم بورادایام
اؤلمه‌میشم هله!
یالنیز داغلاری تیتره‌دن آغیر بیر سوکوت تیخانیب کؤکسومه
نفسیمی کسه‌نه قَدَر
من اؤزومو آنلایاندان بَری هئچ واخت یالنیز اؤزوم اوچون یاشامادیم
اینسان دردینی همیشه دولاندیریرام سیرتیمدا
اودور کی بو گونلرده‌کی حالیمی بیان ائتمک اوچون
شعرین باشماغی دار گلیر دویغولاریما
اینجه دویغولاریمین آیاغینی سورتوب، قانادیر!
بو گونلر سینیق- سالخاق، آخساق  خیی-خیی گئدیرم‌ یاشامی بو سببدن
منی سارسیدان اولایلاردان نه دئییم کی هامیسینی سن ده یاخشی بیلیرسن
کئشکه کئچیردییمیز بو آجی اولایلارین هئچ بیریسی اولماسایدی
وطن، ایستی قوجاقلی آنا وطن اولسایدی!

بیر سؤزله، بیز هامیمیز کورلاندیق،
کوته گئدن، ایت خؤره‌یی اولان چؤرک‌لر کیمی حئییف اولدوق!
قویون اولدوق! اویون اولدوق یارامازلار اَلینده!
حال بو کی آنامیز بیر داها دوغمایاجاق بیزی!
بیر داها یئر کوره‌سینه گلمیه‌جه‌ییک!
کئشکه یاخشی بیر زاماندا دوغولسایدیق!
اینسانین اینسانا قارداشجا مهریبان اولدوغو بیر چاغدا!
***
خط آرخاسیندا دینمه‌سن ده
منه لاقئید اولمادیغین بللی‌دیر، بئینی‌نین بیر کونجونو قیجیقلاندیریرام هله ده!
دئییرلر: درد آغیر اولاندا اینسان لال اولور منیم کیمی!
باغیشلا منی،
بو گونلر ائله قارغاشالییام،
چتین تابلاشیرام اؤزومله ده
گؤره‌سن مایامی باسدیراندا، اوچوروم قیراغیندا اکیلدییمی دوشونمه‌دی آتام؟!
نه‌دن آدام کیمی یاشایانمیرام؟!
هر گون- هر گون منه آغیز آچان قورخونج دره‌لره آیاغیم‌ سویروشور!
کئشکه شوشه یئرینه داشدان یارانسایدی منیم ده اوره‌ییم!

هر حالدا، آغیر سوکوتومون شیفره‌سینی سیندیردیغین اوچون،
منیم هر فریاددان اوجا سوکوتومو ائشیتدییین اوچون مینتدارام سنه!

https://t.me/Adabiyyatsevanlar

🔶ثریا خلیق خیاوی

🔷 ترجمه از ترکی اذربایجانی به فارسی: ثریا خلیق خیاوی

▪️کلمه‌لرین تهدید اولان یئری...

«نیکه»¹ بوگون
نیل نهرینی
ساچی‌نین بیر تئلی‌ ایله
آچدی...
« گون وار عصره برابر»²

گؤرورسنمی؟
نوت‌‌ونو ایتیرمیش
آپاریجی‌لار کیمی‌‌
اؤزونو ایتیریبدی «آرس»³
دورمادان اؤلدورور...

نه‌دن تورپاغی سیخاندا
گئدن‌لر بیر- بیر قاییتمیرلار؟
بلکه‌ ده اؤلوم اونلاری
اینجه‌له‌ییر
ساچلارینین عطریندن
اؤلوم، اؤلور
و بیزی آلداتماق اوچون
سرّ وئرمیر

ایندی سنی گؤزله‌ییرم
شعر میدانیندا
کلمه‌‌لرین تهدید اولان یئرینده
منه
بو قورخولوق‌لارین⁴ گؤزلرینین
نه نول‌ونون اؤنمی وار نه فازی‌نین.

ماوی کؤینه‌یینی اونوتما
یئر ایله گؤیون
بیر اولماسینی ایسته‌ییرم...


۱- اسکی یوناندا «ظفر و غلبه» تانریچاسی‌دیر.
۲- چنگیز آیتماتوو-ون کیتابی‌نین عنوانی.
۳- اسکی یوناندا «جنگ و‌ خشونت» تانریچاسی‌دیر.
۴- آباغی. مترسک.


ترجمه:

▫️جایی که کلمه‌ها تهدید می‌شوند

«نیکه»۱ امروز
رود نیل را
با یک تار گیسوان خود
باز کرد...
«روزی هست برابر با یک عصر»۲

می‌بینی؟
مثل مجریانی که یادداشت خود را
گم کرده‌اند
خودش را گم کرده است « آرس»۳
بدون  مکث می‌کشد...

چرا وقتی خاک را فشار می‌دهیم
رفتگان یکی،یکی باز‌نمی‌گردند؟
شاید هم مرگ آن‌ها را
مطالعه می‌کند
از عطر گیسوانشان
از خود‌بیخود می‌شود
و برای فریب ما
چیزی بروز نمی‌دهد

حالا منتظرت هستم
در میدان شعر
جایی که کلمات تهدید می‌شوند
برای من
نه نول چشم‌های این مترسک‌ها اهمیت دارد
نه فازشان.

پیراهن آبی‌ات را فراموش نکن
یکی شدن
آسمان و زمین را
می‌خواهم...


۰۱ در یونان قدیم خدای ظفر و پیروزی
۰۲عنوان کتاب چنگیز ایتماتوو
۰۳در یونان قدیم خدای جنگ و خشونت
https://t.me/Adabiyyatsevanlar

هاشم ترلان

بیرگون گله‌جک



بیر گون گله‌جکدیر یاغاجاق نور کوره‌میزدن،
سئللر باش آلیب چاغلایاجاق داغ- دره‌میزدن.
شررین گؤزونه اود قالانیب سانجیلاجاقدیر-
شیمشک کیمی گؤیلرده دوغان اختریمیزدن.
ائرکن اویانیب شوخ دیلیمیز نور ساچاجاقدیر-
طوفانلارا مئیدان اوخویان لنگریمیزدن.
اود اوغلو اودوق، اودلارا باغلاندیق ازلدن،
یاندیق وطنین حالینا چیخدیق دریمیزدن.
عؤمروم بویو باخدیم گؤزونه جار ائله‌دیم کی،
خوف ائیله بیزیم کینله دولو قان- تریمیزدن!
تورپاق دا بیزیم، دیل ده بیزیم، ائل ده بیزیمکی
ایلهام آلاجاق اللریمیز، بیر- بیریمیزدن.
آچ قلبینی، قیر زنجیری دیلدن گیروو اولماز!
بلکه ساچیلا نور گئجه‌لر پنجره‌میزدن.
غالب گله‌جک خئیر ایله شررین یاریشیندا
«قورقود» کیمی دیل آل گونشه بنزریمیزدن.
«ترلان» سایاغی اوچماغی اؤیرنسه بو ائل‌لر،
جرعت ائله‌ییب یاد کئچه بیلمز بره‌میزدن.
https://t.me/Adabiyyatsevanlar

ادبیات سئونلر pinned «قادین کتابخاناسی‌نین، حکایه کارگاهی "ادبیات سئونلر گوزگوسونده زمان سه شنبه :1405/4/23 ساعات :9 چکیلیش:  "کریم قربانزاده "ادبیات سئونلر https://t.me/Adabiyyatsevanlar»

رحیم گوزل


1

غریبه بیر گوزگودور
گوز، اینساندا؛
هامینی موتلو گورر
یییه‌سیندن ساوایی.
نه یاخشی کی،
اوره‌یین ده
گوروب، دویماق یولو واریمیش؛
یوخسا،
حسرت، اولدورردی اینسانلاری!..


     2


لازیم دئییل
بو گوندن
صاباح اوچون قایغیلانماق؛
هر بیری
بیر
صاباح ایدی
حسرتینی چکدیییمیز
او دونن‌لر!..

https://t.me/Adabiyyatsevanlar

شعر:دومان_بختیاری

سس:سالار_موغانلی

https://t.me/Adabiyyatsevanlar

شعرجیک لر
کریم قربانزاده



نه یاخشی کی قوش‌لارین
آینا- داراغی یوخدور،
یوخسا
او قده‌ر بزه‌نیب – دوزه‌نردیلر
اوچوش یاددان چیخاردی،
یول ایتیب، باتاردی…!

دوواردان آسیلان شکیل کیمی‌یم
سئمئنت سیزماسیندا بوغولورام
نه سسیم بیر یئره چاتیر،
نه بیریسی الیمدن توتور…!

منه بیر وطن گره‌کدیر:
پرزیدنئتی چیچک اولا
وطنداشی گولوش،
سیرداشی بالیق اولا
یولداشی اینسان…!

قایناق :ایشیق سایتی

https://t.me/Adabiyyatsevanlar

✍️ :ائلمان_موغانلی‌

دونیانین سون اَل یازیسی

دونیا سندن اؤنجه
ساده‌جه اولوب بیتن اولای‌لاردان عبارت ایدی.
یاغیش یاغیردی
آنجاق هئچ کیمسه ایسلانماییردی
آغاج‌لار یاشیل‌لانیردی
یاشیل‌لانماغین آنلامینی بیلمه‌دن.
و اوره‌ییم ساده‌جه گؤوده‌مین بیرپارچاسی‌یدی،
هر گئجه سنین آدینا باغیمسیزلیغینی باغیران بیر اؤلکه دئییل.

سونرا سن گلدین ...
یوووووخ
بو کیلیشه‌نی سیلمک ایستیرم
سن گلمه‌دین.

دونیا
یاواش یاواش
دؤنوب دولانیب
سنه چاتدی.

او گوندن بویانا
زامان قاباغا گئتمه‌گی اونوتدو
و یالنیز سنین باشینا دولاندی.

سئوگی‌دن یازماییرام.
ندنکی
سئوگی،
یازی‌یا کؤچورولدوگو آن،
اؤزوندن بیر پارچانی ایتیریر.

من اوره‌یین ایکی چیرپینتی‌سی آراسینداکی
او قیسا‌جیق زاماندان یازیرام
اوره‌گین،
هر چیرپینتی‌دان سونرا
سنین آدینی قوجاقلاییب
یئنی‌دن یاشاما دؤندۆگو آندان.

هردن دوشونورم،
آللاه یئنی‌دن دونیانی یارادارسا،
بیر قیسا یانلیشی هر آن تکرار ائدر،
سنـ‍ــــی؛
ندنکی بعضی گؤزللیک‌لر
یانلیش دئییل‌لر،
یارانیشین سیرلری‌دیرلر.

من هر گئجه
گله‌جه‌یین بیرپارچاسینی
یوخودا گؤرورم؛

بوتون یوخولاردا قوجالمیشیق.
اَل‌لریمیز قیریش‌لارلا دولو،
آنجاق بارماق‌لارینین آراسی
هله ده دونیانین اَن گۆوَنلی یئری دیر.
و بو سئوگی‌نین اینانیلماز اؤزللیگی دیر.

زامان ساده‌جه
اینسان‌لارین اوزونو قوجالدیر،
سیغیندیق‌لاری یئری دئییل.

بیر گون منی اونودارسان،
سنی گئری قاییتماق مجبوریتینده بوراخان
هئچ بیر شئعیر یازماماغا سؤز وئریرم.

ساده‌جه
بعضا
اَسینتی‌لر
ندنسیزجه‌سینه پرده‌نی ترپه‌درسه
یا دا ماساداکی بارداق
کیمسه توخونمادان
تیتررسه
بیل کی
دونیا سنی سئومه‌نین بوش‌ قالان یئرینه
هله ده آلیشماغا چالیشیر.

یاشامیمداکی اَن بؤیوک تاپینتی‌می
بیرگون مندن سورارلارسا:
آدینی سؤیله‌مک یئرینه
بئله دئیه‌رم:
آنلادیم
بعضی اینسان‌لاری او قَدَر سئویرسن
اونلاردان سونرا
دونیا هئچ بیر زامان
اَسکی دونیا اولماییر.
و بو سون جومله دئییل،
ندنکی گرچک بیر سئوگیسل‌لیک
سونا چاتدیغیندا
اونو اوخویان بیری‌نین سوسقونلوغوندا
یئنی‌دن باشلانار.

https://t.me/Adabiyyatsevanlar

راسیم_کریملی
نئجه‌سن؟

اویوب یاد سؤزونه، یامان سؤزونه،
منی غم اودونا سالان، نئجه‌سن؟
ترلان گنج‌لیگیمی گودازا وئریب،
سن ائتدین عؤمرومو تالان. نئجه‌سن؟!

قارشیندا یئتیم تک بوینومو بوردوم،
یولوندا اوزومو مین اودا ووردوم،
من سندن سعادت، نیجات اوموردوم،
سن ائتدین عومرومو تالان. نئجه‌سن؟

باخمادین آهیما، آمانیما سن،
دوندون یاخین ایکن یامانیما سن.
نه قصد‌دیر ائیله‌دین بو جانیما سن؟
عاغلیمی باشیمدان آلان، نئجه‌سن؟

هانی قلبینده‌کی عشقین دنیزی؟
منه چوخ‌مو گؤردون او گول بنیزی؟
دئییردین اؤلوم ده آییرماز بیزی،
عشقی-محبّتی یالان، نئجه‌سن؟

گؤزونون سئوینجی یاشدیرمی ایندی؟
یئریم اوره‌یینده بوشدورمو ایندی؟
گونون-گوذارانین خوشدورمو ایندی؟
تنهالیق فریادی چالان، نئجه‌سن؟

«راسیم» یار دئییل کی یاریندان دویان،
عؤمرو اویون سایان، اویونجاق سایان.
اؤزونو طعنه‌لر آلتیندا قویان،
بختینین دوشمنی اولان، نئجه‌سن؟


https://t.me/Adabiyyatsevanlar