انصار قاراداغلی2

تنهالیق قیزیل آت بئلینده چاپار-چاپار کائناتین تانینماز-بیلینمز چنلی بئللرینده پروازا گلن قیزیل قوشو سارسیدیب آیاقدان سالا بیلمیر ، او  یاخجی باشا دوشور کی گئتدیی یوللاردا اوندان قاباق گئدنلر وار و سیلینمز ایزلر قالمیش ، او سببه الینده بیر مصری قیلینج دا حس ائدیر :

" دومرولون الینده ائو قوران ایمیش
کور اوغلو بئلینده خان قیران ایمیش
شاه اسماعیل چاغی توپ قیران ایمیش
ستارخاندان بری قالمیش قینیندا !..."

قیزیل قوش اوءز مبارزه سینی معلم اولاراق باشلامیشدی ، او معلمین معلمی ، یا بئله دئسک ده معنالی اولار : او مولوینین بیر پیران شمسی بیر یوللوق غیب اولموش ؛ صمد بهرنگینین آرازلا دریایا جومماسی اونون قلبینی یامان آلاولاندیریر :

" قیشدا قارلی داغلار سوراقلاشسالار
تبریزین گول اوغلون ، مهربان اوغلون
بیر هارای چکره م : ای اوجا داغلار
آختارین آرازین چنلی بئلیندن
... ....
دوشمان طعنه وورسا صمد هاردادیر
الیمی سینمه چالیب دئیه رم :
صمد قلبیمده دیر ؛ اوره ییمده دیر
دوءیوشور ، اوءلسه ده دوءنمز ائلیندن !..."

تورپاقلارین دوغما قارداش اولماسی سعدی دئمیشکن انسانلاری بیر تن و جانین اعضاسی قیلیر ؛ مباریز قیزیل قوش اوچون ایرانین تامام خالقلاری اونا صمد بهرنگی سایاق بیر قارداشدیر ، او قیزیل قوشون قانادلاری بعضا اولور کی کردستان داغلارینین ذیروه لرینه سورتوشور :

" بو داغلار اوجا باش
اوجا باش داغلارا قانلی چکمه لر یول آچا بیلمز
بو داغلار قوجا باش
ائللری اوجا باش
دره لر درین
سولار آتشین
یایلاقدا اوبا
اوبادا چوبان
آخشاملار هر قوش
قوشور بیر دستان :
بورا کردستان
              بورا کردستان !...  "

ملعون شاهین قانلی چکمه لی جلادلاری  آخشاملار شعیر -آوازلا دستان قوشان قوشون نغمه لرینی آزادلیقین آیه لری دویدوقدا سیلاحلانیرلار ؛ ۱۳۵۰-جی گونش ایل باهارین یاشیل چاغلاری یووا سئودالی قیزیل قوشو تهرانین قارا قفسلرینین بیریسینده گولله ییب شهید ائدیرلر !...
قیزیل قوشون سون نغمه سی اوره یی ایله گولله لنیر :
" گلمیشدیم داغلارا بیر نماز یازام
سولارا سوءیله یم من ده نمازام
اوختای ؛ قیزیل قوشام ، اوجا پروازام
داهییام ، یوواما گئدیره م ایندی !

سیز ای قلبیم اوچون آذان گولله لر
آدیمی قانیملا یازان گولله لر
مندن جان آلماغا اوزان گولله لر
منی گود دئمیشدین ، گودوره م ایندی !

گلین اورییم له وئرین ال اله
گئده ک بیر شهره بیز گوله- گوله
کرمم ، یوباندیم ، گوءزله ییر له له
اصلی لبلریندن دادیرام ایندی !... "

-----
* - مطلبی ۱۳۷۷ -جی ایل یازدیم امید زنجان هفته لیینین ویژه نامه سینده چاپ اولدو.
۱۳۹۹-جی ایل یئنیلشدیریب اینترنت ده پست ائتدم.

https://t.me/Adabiyyatsevanlar