ای عشق!

کریم گول اندام

ای عشق!
ایللر منی رسوای جهان ائیله دین ای عشق!
رحم ائیله مه دین باغریمی قان ائیله دین ای عشق

من هرنئجه  گیزلتمه یه سئودامی چالیشدیم
سن سیرریمی  هریئرده عیان ائیله دین ای عشق

سکسندی یاشیم ،عاغلی هوشوم یوخدو باشیمدا
بویاشدا منی بیرده جوان ائیله دین ای عشق!؟

هوپدون قانیما هرنفس اولدون منه همدم
یوخسامنی بیگانه گومان ائیله دین ای عشق!

وارلیقدا گزه بیلمز ایدی ذره ی اجرام
سن اورتادا ایجاد زمان ائیله دین ای عشق

احسن سنه من دیلسیز  اولان یئرده باغیردین
جرعتله دوروب حقی بیان ائیله دین ای عشق

دولدوقجا جوشان قانیما روحوم  تزه لندی
اؤلمز دا کریم سن نه طوفان ائیله دین ای عشق!
شهریور۱۴۰۵_اورمو
 
https://t.me/Adabiyyatsevanlar