اونلار هامیسی آیاغا دوروب ننه نی قوجاقلاییب اؤپدولر . اونون آغیلی کلاملارینا آلقیش دئدیلر . 
کریم دئدی : 
ــ  دوستلار ، ننه دوز دئییر . اصل یول ، زحمتین یولودور ، گلجه یین یولودور . من تردود ائتمه دن ننه دئین یولو سئچیرم . 
ــ بیز ده زحمت یولونو چئچیریک ، ـ  دئیه او بیریلر ده خورلا جاواب وئردیلر . 
ــ قوی طیلسیم لر ، قانلار ، قادالار ، ظولم و نیفاق ابدیلیک محو اولسون  ـ دئیه احمد بارماغینداکی سئحیرلی اوزویوچیخاریب حیطده کی قویویا آتدی . ائله بو آن گؤی گورولدادی ، ایلدیریم چاخدی ، قارا اجینه اؤزوندن گئتدی . دوستلار قارا اجینه نی ده سورویوب قویویا آتدیلار . سونرا قویونو داشلا دولدوردولار . هامیسی سس ـ سسه وئره رک بیر آغیزدان دئدی : 
ــ  گلجک بیزیمله دیر! 
ــ  زحمت بیزیمله دیر! 
ــ  سعادت بیزیمله دیر! 
ننه ایسه اؤز ایشینده ایدی . او ، تلسه ـ تلسه  خالچانین سون ناخیشلارینی ووروردو. اللری گؤرونموردو . سون ناخیش وورولان کیمی خالچا یئریندن ترپنمدی . ننه سئوینجله سسلدی: 
ــ بالالاریم ، یاخین گلین ، خالچامیز سئحیرلی دیر. بویورون ، سیزی اوغورلو سفر گؤزله ییر . 
اونلاردؤردوده سئوینجک خالچانین اوستونه چیخدیلار . احمد اوزونو ننه سینه توتاراق : 
ــ  ننه جان ، اوچوشوموز گونشه دوغرودور! ـ  دئدی . ـ بیز گونشدن اود آلیب قاییداجاغیق . ائله بیر اود کی ، بوتون یئر اوزونده یاشایان ، اولدوزلو ، آیلی گؤیلرین آلتیندا باش ـ باشا  وئرن دوستلاریمیزی اؤز نورونا قرق ائدجک .
او نور حاقسیزلیغین ، ظولمون کؤکونو کسَجَک . انسانلاری بیر ـ بیری ایله دوست و قارداش ائدجک . ظولمکار شاهلارین ، خانلارین ، طیلسیملی جادوگرلرین تیفاغینی یاندیریب ـ یاخاجاق !
 احمد سؤزلرینی بیتیرن کیمی خالچا اونلاری یاواش ـ یاواش بولودلاردان یوخاری قالدیردی . ننه اونلارین آردینجا سو آتیب اوغور دیله دی . سئوینجدن گؤزلری یاشاردی . 
دوستلارین ماهنیسی اطرافا یاییلمیشدی . 
زحمتله اوجالمیشیق ، 
تورپاقدان گوج آلمیشیق ،  
اوغورلودور یولوموز ، قووتلی دیر قولوموز ! 
سون 

https://t.me/Adabiyyatsevanlar