اوشاق ادبیاتی

۱۰
 سئحیرلی اوزوک 
اونونجو ناغیل :
« هر شئی زحمت ده دیر »
یازان : علی صمدلی
کؤچورن : علی آغ گونئيلی  ــ  ابرازی
کتاب :‌ ژنرالین اوشاقلیغی ) پووئست لر بؤلومو )

احمدین اومیدی هر یئردن کسیلمیشدی . ایندی او ، دوشونوردو کی ، کاش طیلسیمدن آیاغا دورا بیلیدیم . اوول کی کیمی مئشه دن اودون گتیریب ساتایدیم . کاسیب داخمامیزدا ننه م ایله باش ـ باشا وئریب یاشایایدیق . هردن ده اونا گوج گلیر ، اؤز ـ اؤزونه دردلی ـ دردلی زوم ـ زومه ائدیردی . 
قریبم یوخدور آرخام ، 
قانادیم یوخدو قالخام .
چیخام قلبی داغلارا ، 
بیر سنه ساری باخام . 
ننه گتیریب نوسی نین قارشی سینا سوفره سالدی ، چؤره ک قویدو . 
احمد قملی ـ قملی دئدی : 
ــ ننه جان ، ایشتاهام یوخدور ، هئچ نه ایستمیرم . 
ــ  ننه قوربان ، یئمه سن اوزولرسن . فیکیر ائلمه ، چؤره یینی یئ . 
ــ  ننه جان ایندی منیم نه شاهانم ، نه سئحیرلی خالچام ، نده سئحیرلی اوزویوم وار . بودور دوستلاریم سلیم و کریم دن ده  بیر خبر چیخمادی . یقین  جیم ـ سیم شاه اونلاری توتوب زیندانا سالدیردی . منیم ده آیاقلاریم بئله . ننه جان بس بیز نئجه دولاناجاییق ؟ 
ــ  اؤز حلال زحمتینله ، منیم بالام ، ـ  دئیه ننه احمده تسکینلیک وئردی . سن هئچ فیکیر ائلمه ، تئزلیکله دوستلارین قاییدیب گلجکلر . 
ائله بو واخت حیطین آیاغیندا گولوش سسلری ائشیدیلدی . کریم ، سلیم و شاهانه سئحیرلی خالچانین اوستونده اوچوب گلدیلر . احمد یئریندن بویلاناراق ننه سینی چاغیردی : 
ــ  ننه جان ، حیطدن سس گلیر ، بیر گؤر نه سسدیر . 
ننه تلسیک حیطه چیخدی . احمد ین دوستلاری و شاهانه نی گؤروب سئوینجله احمدین اوستونه یویوردو . 
ــ  احمد ، گؤزون آیدین اولسون ، دوستلارین دا شاهانه ده گلیب چیخدی . 
احمد سئویجیندن اوشاق کیمی یئرینده آتیلیب ـ دوشدو.آنجاق قالخا بیلمدی . سلیم ، کریم و شاهانه اونون اوستونه آتیلیب گؤروشدولر . سلیم اوزویو احمدین بارغینا تاخیب دئدی :
ــ  بودا سنین سئحیرلی اوزویون ! 
کریم خالچانی یئره سریب دئدی : 
ــ  بودا سنین سئحیرلی خالچان ! 
سونرا هر ایکیسی شاهانه نین قولوندان توتاراق خورلا دئدیلر : 
ــ  بودا سنین شاهانن ! 
سئحیرلی اوزوک احمدین بارماغینا تاخیلان کیمی او ،  طیلسیمدن قورتاریب آیاغا قالخدی . دوستلارینی قوجاقلاییب اؤپدو: 
ــ  احسن سیزه وفالی دوستلاریم بو گون شادلیق گونو، بایرام گونودور. گلین اوینایاق ، گولک یاللی گئدک ! 
دؤردوده شنلندیلر ، یاللی گئتدیلر . اونلارین بئله شادلیلیغینی گؤرن ننه کناردان باخیب سئوینیردی . 
سلیم اونو دارتا ـ دارتا گتیریب اؤز دسته لرینه قاتدی . ننه نی ده اؤزلری ایله اویناتدیلار. لاپ یورولوب الدن دوشنده احمد دئدی : 
ــ  دوستلار ، سوفره آرخاسینا حاضیرلاشین ، بو گون شادلیق گونودور! 
او ،  اوزویون توزونو سیلیب قارا اجیننه یه امر ائتدی : 
ــ  بو ساعات بورادا گؤزل بیر سوفره آچیلسین !
گؤی گورولداییب ، ایلدیریم چاخدی ، بیر گؤز قیرپیمیندا  اوستو دادلی ، لذتلی یئمکلر دولو سوفره حاضیر اولدو . احمد دوستلارینی و شاهانه نی سوفره یه دعوت ائتدی. هامی ایلشیب ننه نین گلمه سینی گؤرله ییردی .ننه ایسه گلمک بیلمیردی. احمد اونو سسلدی 
ــ  ننه جان ، سنی گؤزله ییریک ، تئز گل .
ننه دن ایسه سس چیخمیردی آخیردا احمد آیاغا دوروب اونون دالینجا گئتدی . ننه اونلارا یاخینلاشیب دئدی : 
ــ  بالالاریم ، من او سوفره دن چؤره ک کسمرم . بیلیرسینیزمی اجینه لر او یئمکلری هارادان گتیریبلر ؟ 
هامیسی چینین چاتیب بیر آغیزدان دئدی : 
ــ یوخ ، بیلمیریک . 
ننه سؤزونه داوام ائدرک دئدی : 
ــ ائشیدین و آگاه اولون کی ، بو سوفره دکی بوتون نعمت لرین هامیسینی اجینه لر اوردان ـ بوردان اوغورلاییب گتیریرلر . بونلار هامیسی اؤزگه امه یینین بهره سی دیر . اینسان اولان کس ایسه ، اؤز حلال زحمتی ایله یاشامالی دیر . اوغلانلاریم ، سیز آغ دیوی محو ائتدینیییز کیمی بوتون اونون طیلسیملرینی ده همیشه لیک محو ائدین . من بو گونلرده داغلاردان یئنی چیچکلر ییغمیشام . یوز بیرینجی رنگی تاپمیشام . بو گون خالچامیزین سون ایلمه لرینی ووراجاغام . منه ائله گلیر کی ، لقمانین دئدییی کیمی خالچا سئحیرلی اولاجاق . ایستدییینیز یئره اوچا بیلجکسینیز .
ننه اوزونو احمده توتاراق هیجانلا سؤزونه داوام ائتدی : 
ــ  اوغلوم ، احمد ، اگر دوغرودان دا ، خالچا سئحیرلی اولارسا ، او زامان وفالی دوستلارینلا ، گؤزه ل شاهانن ایله آزاد دیلکلر اؤلکه سینه اوچ . اوزاق ـ اوزاق ائللره ، اوبالارا ، سیزه ال ائله ین گؤزدن اوزاق یئنی یئنی اولدوزلارا یول آچین . هر یئرده انسانلارا حاققین ، عدالتین ، حلال زحمتین یولونو گؤسترین .