یئنه بیزه پاییز گلیر!…
ع. ن. چاپار
یئنه بیزه پاییز گلیر؛
نغمه‌سینی دینله‌ییرم –
بیر سیزغینین.
ائله گلیر منه گویا
هر بیر نسنه سیزیلداییر؛
– سانکی نه‌یه یاس توتاجاق بیر کیمسه تک!…
گؤزه چارپیر کوچه‌لرده
کوچه‌لرین سوکوت–سوکوت استقبالی..
بودور بیزیم کوچه‌لرین –
ساری طالع، بوز اقبالی!…
یئنه بیزه پاییر گلیر؛
سحر سالیب چؤهره‌سینه
دومان – دومان اؤرپه‌یینی.
اوره‌ییمله ائشیدیرم –
هر بیر گولون اوره‌یینی.
دینله‌ییرم
آغاجلارین ساریلیقدا ایتیب – باتان
یاشیل – یاشیل دیله‌یینی!…
بولاقلارین زینه – زینه آخار سویو
بیزیم بوگون اوجا – اوجا
متانتله سوسوب باخان داش داغلارین
ایلیق – ایلیق گؤزیاشی تک اوره‌یینی
یای چؤللره،
یای مئشه‌یه!
قوی دونماسین اوره‌یینده
یاشیل – یاشیل آرزیلاری آغاجلارین؛
چؤل گوللری –
نفس آلسین بو داغلارین نفسیندن؛
هاوا دویسون یارپاقلارین
یاز قوخولو نغمه‌سیندن!…
یئنه بیزه پاییز گلیر؛
اؤزلویونو اؤز الی‌له
شاختالارا بئیعه وئره‌ن ساری اوره‌ک،
ساری ساچلی بیر قیز گلیر؛
پاییز گلیر
پاییز گلیر!…
https://t.me/Adabiyyatsevanlar
Post #30843
244