پیچیلتی حیکایه
یازان:زومرود یاغمور
کوچورن:سحرخیاوی
باکی،۱۸آپرئل
چَکیلیب بیر کَناردا اوتورْدوم. یئنه ساکیت ایدیم. او یئنه زارییب یالواراندا عَجیب بیر شئی باش وئردی. مَن، مَن اولماقدان چیخدیم. بئینیم هئچ گؤرمَدیییم بیر فیلمین کادرلارینی ایزلَه‌ییرمیش کیمی ایدی. او فیلمین قَهْرَمانی دا مَن یوخ، آنام ایدی.
مَنیم یئریمه دَه او قالخدی، بارداغا سو دولدوردو، داوا‌نی گؤتوروب آتامین یانینا یاخینلاشدی.
-بونلاری سَنه مَن وئرْمَدیم، آنام وئردی. مَن وئرْمَدیم.
آتامین گؤزلَری بؤیودو، سو بُوغازینْدا قالدی، بُوغولوب اؤسکورْمَیَه باشلادی. آنام چَکیلدی و مَن یئنه تَک قالدیم.
-نَه سَرسَملَه‌ییرسَن سَن، نَه دانیشیرسان؟ - بُوغولا-بُوغولا دئدی.
ایل‌لَردیر اؤزونو ایناندیرْدیغی یالانلار داغیلیب تؤکولوردو. «پیس اولان مَن یوخ، آناندی».
یالانی، اونو آیاقدا ساخلایان یالاندی. بو دایاغی اونون اَلیندن آلمیشدیم. اؤز گَرچَک کیملییی ایله اوز‌لَشْمیشدی.
-آنان یوخدو، اؤلدو. سَنه یییه دورا بیلمَه‌دی، سَنی آناسیز قویدو.
-آنام وار، قَبْریستانلیقدادیر. بوردان چیخیب زیارَتینَه گئدَه‌جَم. آمما سَنین هئچ دَفنینْدَه دَه اولمایاجام، هئچ مَزارینا دا گَلمَیَه‌جَم. سَنی کیم هاردا باسدیراجاق، هئچ اوندان دا خَبَرَیم اولمایاجاق. قَبرین کیمسه‌سیزلَر مَزارلیغیندا ایتیب-باتاجاق.
دیرِیکَن مَنه آتا اولا بیلمَه‌دینسَه، اؤلۆکَن دَه اولمایاجاقسان. دیریکَن بیر شئی اولا بیلمَیَه‌نلَر اؤلۆکَن دَه هئچ کیم کیمی قالمالی‌دیرلار.
آراملا دانیشیردیم، قالخیب گئتمیردیم. اونون بُوغلانا-بُوغلانا اؤلْمَیینی ایزلَییردیم. خئیلی چَکدی. مَن هئچ نَه حیس ائتمیردیم.
اینانین، بو دا قیصاص دئییلدی، قیصاص اولاجاق بیر دوروم دا یوخدو. آنجاق گؤزلَه‌ییردیم. یا دا بَلکَه اونون اؤلْمَه‌ییندن اَمین اولماق ایستَه‌ییردیم.
گئجه بیرَه ۲۵ دقیقه قالمیش سون نَفَسینی وئریب گؤزلَرینی تاوانا دیكدی.
قالخدیم، یاخینلاشیب اوزونَه باخدیم. تۆپۆرجَه‌یی هَمیشَه‌کی کیمی دوداقلارینین کَنارینا ییغیلْمیشدی. گؤزلَرینَه باخاندا اَمین اولدوم کی، مَنیم قارانلیق یانیم بو آدامدیر.
گؤزلَرینی قاپامادیم، توخونماق ایستَه‌میردیم اونا. قاپینی آرخامجا باغلاییب قونشونون قاپیسینی دؤیْدوم.
صوغرا خالا، اؤلدی. مَن باسدیرمایاجام. زَنگ ائدَه‌جَم، صاباح گَلیب آپاریب کیمسه‌سیزلَر مَزارلیغیندا دَفْن ائلَه‌سینلَر.
قادین بیر سؤز دَه دئمَه‌دی. گؤزلَرینْدَه مَنَه قارشی آجیق دا یوخدو.
لیفتَه(آسانسور) مینْمَه‌دیم، پیلله‌کَنلَری اَئنیب حیاطا چیخاندا ساکیتلَشدیم.
سونرا بورا گَلدیم.
گارسون سَحر یئمَه‌یی گَتیرْدی. دَنیز آرا-آرا مَنه باخیب باشینی تَرپَدیردی، آغزینْداکی تیکَه‌نی تَلَسیک اودوب کَسیک-کَسیک نَسَه دئییردی.
مَن هیجانلی ایدیم. قاپی آچیلیب باغلانْدیقجا سَحر هاواسی ایچَرییه خؤش بیر سَرینلیک یاییردی. پَنجَره‌دَن گؤرونَن دَنیزین قیریشیقلاری آچیلْمیشدی، اطلس کیمی پارلاییردی.
-نَه‌یَه مَنی سئچدیز؟ بوردا چوخ آدم واردی.
31
دَنیز اَلینْدَه‌کی تیکَه‌نی بوشقابا قوْیوب اوزومَه باخدی. اوزو ایندی داها ساکیت و آیدین ایدی. گؤزلَرینین اَطرافینْداکی قیریشلار دَنیزین اوزونْده‌کی قیریشلار کیمی آچیلیب یوخ اولموشدو.
-چونکی سَن بورالاردان دَئییلسَن. دورومون بیرینی باغلاییب یئنیسینَه کئچَندَه نانکور اولاد کیمی سورغولانماق ایستَمَه‌دیم. حیکایَه‌مین ایچینْدَه نَه اولدوغونو بیلَنلَر دَه، بیلمَیَه‌نلَر دَه اونلار کیمی اولمادیغیما گؤرَه مَنه کین توتاجاقلار.
مَثَلَن، او قاپینی ائله‌جَه باغلاییب چیخا بیلمَه‌دیکلَری اوچون کین بَسلییه‌جَکلَر. اؤزومو قوروماق ایستَه‌دیم.
آزاد اولا بیلمییه‌نلَرین آزاد اولا بیلَن‌لَرَه کین بَسلَه‌مَسی کیمی.
عینَن اولا بیلمَدییینه کین ائتْمَک، اؤزونو اؤزلییندن قورویا بیلمَه‌یَن اؤز راهینی تاپماق اوچون بَلکَه دَه تَک یولدور. مَنه قارشی یؤنَلدیلَن کین مَنَه یوخ، کین ائدَنلَرین اؤزلَرینَه‌دیر.
-سوسا دا بیلَردینیز.
-دوزدور، آمما سیزی گؤرَنده دانیشماق ایستَه‌دیم و شانسیمی سینادیم.
دَنیز حیکایَه‌سینی دانیشیب گئتمیشدی.
دَرین نَفَس آلیب گؤزلَریمى آچدیم. ایپَک کیمی نازیک سَحر مِهى دَریمَه توخونوب کئچدی.
گئری قایناریب دَنیزین گئتدییی اِستیقامَتَه باخدیم. یورغوندوم. آمما راحات نَفَس آلیرْدیم. اورَه‌ییم ساکیت ووروردو.
دَرین‌دَن کؤکس اؤتوردوم. ایلک آددیمیمی آتدیم.
«سَنین بالاجا اَللَرین مَنیم بؤیوک یارالاریمی ساغالدا بیلَردی. سَن اَللَرینی آرخاندا گیزلَدیب یاراما توخونماق ایستَمَه‌یَنده مَن چوخ تَک قالدیم.»
آنامین پیچیلتیسی قولاغیمدان سوزولوب کئچدی.
بالاجالارین بؤیوکلَری قوروماق ماموریتی یوخدو، بوندان اَمین ایدیم. آمما دَنیزین حیکایَه‌سینی دینلَه‌دیکدَن سونرا آنلامیشدیم - بوردا هئچ بیر قادینا بؤیومَیَه ایمکان وئریلمیر.
Post #30838
254