شاه ـ وزیر اویونو

ناصر داوران

منیمله پایلاش
آجیندان اؤلن اومولارینی
یاشامادیغین چؤره ک امنیتین
سئوگی بلوغون،
یادداشیندان سیلینمیش توکنمزلییی.
**
دونیانین اؤفکه سی
جالانیر ایستک لرینه
هورور قدسیته یول آچان
خمارگؤزلو دلبرلییه
آلچالارین تورشاشیرین ناغیل لارینا
کؤرپولرین یاراتدیغی توختاقلیغا.
**
بیری گلیب
گونشین یئرینه شام تاخیر
بسته لری بالتالاییر؛
دانیشاندا
یاشی میندن آشان
بؤجک پؤهره لنیر آغزیندان.
قورد اولوب ایتین قارداشی
گئجه لر گدیک باشیندا توی چالینیر
بایرام اولور.
**
سن پریشانلیغین قاتی لعنتی
شیطانین قاداسینا یازیلمیش
کئچیلمز بیر گناه سان
قارانلیغا سورگون؛
هر سحر ماسالارا دوزولن
یئمه لی یئم سن
وطن سن
من سن.
**
بایقوش شاه اولان یئرده
زلزله وزیر اولار
قورولو یووا، ماتاه؛
گوزگولری ده سیندیرارلار.
۱۴۰۵/۰۶/۱۵
https://t.me/Adabiyyatsevanlar