اوستاد شهریارین حاققیندا بیر غزل:

مهنازصابونی (آیتای)

سندن آلیشیر شعرین اوجاغینداکی سؤزلر
حیدربابانین ایستی قوجاغینداکی سؤزلر

چاغداش غزلین اینجی سی، اولدوزلاری سن سن
اوندورد گئجه لیک آی دی سوراغیندا کی سؤزلر

داغدان اوجادیر باشی سهندییه نین، آنجاق
چال _ چال پاپاغین آزدی سایاغیندا کی سؤزلر

تامسینماغا گلسین دئ گینن "هرگئجه یاری"
عشقیله آخیر شعر بولاغیندا کی سؤزلر

"محراب شفقده" یازیلان قانلی غزل دیر
گویا کی سنین بارلی دوداغیندا کی سؤزلر

دوشدو یولا تورکون دیلینین کروانی سنله
توتدو یئر اوزون، دویغو دوراغیندا کی سؤزلر

ساز _سؤز آغاجین  وارلیغی سندن کؤکون آلمیش
ماهنیلا چیچک آچدی بوداغیندا کی سؤزلر

ایچدیر منه قوی سالسین آیاقدان قوجا شاعیر
سئوگیله جوشان اودلو چاناغینداکی سؤزلر

اود توتدو، آلوو لاندی، کوله دؤندو اورکلر
شعرین شاهی!  ایللر دی فراغینداکی سؤزلر.


             https://t.me/Adabiyyatsevanlar