ساوالان
انصار قاراداغلی
ساوالان ، قارلی ـ قیاملی ساوالان کؤلگه سی سالمیش ...
اودلو ـ آتش لی آذربایجانا جان کؤلگه سی سالمیش ...
یوخوسوز بیر گونشی یئلکه لمیش قوللو ـ بیلَک لی
آرانین ، میل ـ موغانین اوستونه قان کؤلگه سی سالمیش ...
تانری اوغلو ، بو قوروقدا قوزو اولدوزلار آییندیر ؛
قارا سلطان ، بو قلمرودا چوبان کؤلگه سی سالمیش ...
اؤز یاراسین آچیب آغلیر اوبادا قبله پریسی
ساوالان ، قدسی -ثریّادا آذان کؤلگه سی سالمیش ...
قوردلارین کوشکورور آللاه ، یازیق السیزلرین اوسته !
شاه داغی ، کؤرپه کؤنوللرده فغان کؤلگه سی سالمیش !...
انسان ائولادلارینین کؤکسونه بوزقورد تپیله ندن ،
چارتلایان باغرینا داغلار دا دومان کؤلگه سی سالمیش ! ...
توی آتی ، سن دئنه ، ناموسلو ایگیت لر ییخیلاندان
ظولموکار بَی لر ائل اندامینا « خان » کؤلگه سی سالمیش ! ...
سس گلیر سان ده ده لر سازلارینین هر نفسیندن ؛
آل اوفوقلار ساوالان زلفینه « دان » کؤلگه سی سالمیش ! ...
گولله لر قانلی ، قیلینجلار قادالی ، خَلقیم امانسیز ...
ساوالان ، یالنیز اومودلاردا آمان کؤلگه سی سالمیش ! ...
دینله یین ، سؤیله سین او ایلدیریمی قمچی قیلان قیز ،
آرازین پنجره سی داغدا موغان کؤلگه سی سالمیش ! ...
سووْلانان کسگین اوراقلار ، کیشی لر پنجه لرینده
ساری سونبوللو بو دوزلرده آران کؤلگه سی سالمیش ....
لایلاسی ، یؤخسول آنا سوره سی - اینجیلی سایاقدیر
کؤرپه عیساسی بئشیک لرده قرآن کؤلگه سی سالمیش ...
تانری ساچ ـ ساچ بزه نَرکن ، باشینا آینا گؤتورموش
تویو ـ توراتی مصللادا اوزان کؤلگه سی سالمیش ...
ساوالاندیر ، قورو یئرده قورولوب قصری _ بیناسی
بو دا دؤولتلی جهانگیردی ، جهان کؤلگه سی سالمیش ! ...
ساوالاندیر - ساوالاندیر - ساوالاندیر - ساوالاندیر ...
اورستین قلمی اوسته رمان گؤلگه سی سالمیش ! ...
https://t.me/Adabiyyatsevanlar
Post #30822
581