چاپدان سونرا(مقاله)
یازان:هان کانگ
چئویرن: حمید پیرییئو
کوچورن: ویدا حشمتی
حاضیرلایان:ادبیات سئونلر
۱. رومانیم چاپ اولوندو. آرتیق، دان سؤکولنده دوروب شام یاندیرماسام دا اولار. بو خلوت ائوده الکتریک کسیلنده شام ایشیغی‌نین اوتاغی نه قدر آیدینلاندیردیغینی گؤرمک اوچون کومبینین سئنسور لامپاسی‌نین اوستونو اؤرتمه‌سم، سویودوجونو الکتریک یوواسیندان آییرماسام دا اولار. دیو بویدا کؤلگه‌نین تاواندا اویناشماسینی گؤرمک اوچون الیمده شاملا دولانماسام دا اولار. شام ایشیغی هر دفعه اوستلرینه دوشنده آلچاق سس کیمی اوزه چیخیب سونرا تزه‌دن قارانلیغا غرق اولان کیتاب آدلارینی اوخوماسام دا اولار. اووجومداکی قارین اریمه‌یی‌نین وئردییی حیسّی بدنیم خاطیرلاسین دئیه الیم سرتلشیب کئییینه قدر اووجومو آچیب-یومماسام دا اولار. هر دفعه قار یاغاندا تاکسی ایله یاخینلیقداکی داغا گئتمه‌سم ده اولار. داغین اتگینه چاتاندا قار کسیلدییی اوچون کدرلنمه‌سم ده اولار. داغا گزمگه گلنلره خیدمت ائدیلن کافه‌ده گؤیرتیلی دویونون یاریسینی بئله یئمه‌میش تزه‌دن قار یاغدیغینی گؤروب تلسیک آیاغا دورماسام دا اولار. جیغیردان چیخیب مئشه‌نین ایچینه، بیر آز درینلییه گئتمه‌سم ده اولار. داها چوخ اوخوماسام دا اولار. آختاریش سیستمینه «قتل‌عام» یازماسام دا اولار. چوخوردا اولماغین نئجه بیر شئی اولدوغونو حیسّ ائتمک اوچون استولون آلتیندا قیوریلیب یانی اوسته اوزانماسام دا اولار. هر گون کئچدیییم یولون قیراغینداکی تپه‌ده آغاجلارین آراسیندان گون ایشیغی سوزولوب یاشیل‌لیغین آلتینا کؤلگه سالاندا اوراداکی جسدلرین چورودویونو ذهنیمده جانلاندیرماسام دا اولار. آغلاماسام دا اولار. آرتیق گؤز یاشلاریملا اوزومو یوماسام دا اولار. کولکلی بیر گونون گئجه یاریسیندا چای قیراغیندا گزمه‌سم ده اولار. ساغلاردان چوخ اؤلولری اؤزومه داها یاخین حیسّ ائتمه‌سم ده اولار. آرتیق بو روماندان ال چکمه‌سم ده اولار. بو رومانین اسارتیندن خلاص اولاجاغیم او نامعلوم گونو گؤزلمه‌سم ده اولار. آزادلیغیما قوووشاندان سونرا ائتمک ایستدیکلریمی ائتملی اولدوقلاریمین سییاهیسینا یازیب سییاهینی اوزاتماسام دا اولار. ۲. یونگوللشیرم بیر آز دا یونگوللشیرم ائله‌بیل سوموکلریمین و دریمین ایچینده هئچ نه قالماییب. صوبح آچیلمامیشدان اوّلکی قارانلیقدا فیکیرلشیرم. آرتیق اوزاقلاشان بیرینه اوخشایان رومانیمی. بیز بیر-بیریمیزی قوجاقلامیشدیق، جان هؤولویله بیر-بیریمیزی دستکله‌ییردیک. آمّا آخیردا بورادا تک قالدیم. یاخشی، بس «من» اصلینده کیمدیر؟ بیر واختلار «من» اولان آدام بو رومان اوجیباتیندان اونسوز دا دگیشدییی اوچون آرتیق گئری قاییدیب او آدام اولماغیم مومکون دئییل. بئله دیرسه، سوالی باشقا جور قویوم. ایندیکی «من» کیمدیر گؤره‌سن؟ بو قدر بوم-بوش، بو درجه‌‌ده چیلپاق قالان اینسان. ۳. رومانیمی یازدیغیم واختلا مقایسه‌ده ایندی داها آز کیتاب اوخویورام. گزینتییه آز چیخیرام، آز ایسینمه حرکتلری ائدیرم. عضله برکیتمک مشقلرینی ده آزالتمیشام. گون‌اورتادان سونرا اوزانیب موسیقی دینله‌ییرم. هردن اوتوروب پالتار یویان ماشینین سسینه اوّلدن-آخیرا قولاق آسدیغیم دا اولور. سییاهیدا یازیلان ایشلرین هامیسینی چوخدان ائتمیشم. گؤرمک ایسته‌دیگیم آداملارلا گؤروشدوم. اوخوماق ایستدیکلریمی اوخودوم. باخماق ایستدیکلریمه باخدیم. بیر واختلار گئتمک ایسته‌دیگیم سئونیودو پارکینداکی قارابالیغی خاطیرلادان بینالارین آراسیندا و یام-یاشیل مئشه‌ده گزیب ائوه قاییتدیغیم دا اولدو. ۴. بیر دوشونجه – قرار – آغلیما گلیر. یئنه یازسام اولار، یئنی بیر رومان یازسام. یئنه علاقه قورماغین یولو بودور. یاخشی، بس یازی واسطه‌‌سیله نه‌یله علاقه قورورام؟ تکجه یازینین علاقه‌‌لندیردییی او شئی اوچون بئله چیلپاق و مدافعه‌سیز حالدا حاضر گؤزله‌ییرم؟ الکتریک آخینی‌نین کله-کؤتور منلییه تاخیلیب کسیلمه‌مه‌سی اوچون؟ ۵. هر نسه روتینیمه گئری قاییدیرام. جومله‌‌لرین چوخلوغو ایله تزه‌دن انرژی توپلاماق اوچون هر گون رومان و بیر شعر کیتابی اوخویورام. تزه‌دن ماسا آرخاسیندا اوزون مدت اوتورا بیلمک اوچون گونده ایکی ساعت ایسینمه و عضله برکیتمه مشقلری ائدیب گزینتییه چیخیرام. آنجاق هفته‌لر بویو جمعی-جوملتنی بیر صحیفه یازاندان سونرا بونون فرقینه واریرام: حاضردا تزه رومان یازماغا باشلاماق عاغیللی ایش دئییل. قارین حئکایه‌سینی تریلوگییا(اوچ بؤلوملو فیلم یا کیتاب اوزوکلزین افندیسی کیمی مجموعه)کیمی فیکیرلشمیشدیم. یازدیغیم ایکی اوزون حئکایه‌نین اوزون مدت‌دیر آیری قالماغینی اورگیمه سالمیشدیم؛ بونون اوچون اوچونجو حئکایه‌نی یازیب، هامیسینی بیر کیتابدا توپلاماق قرارینا گلمیشدیم. آمّا چوخ سویوقدور. بوندان آرتیق اوشومک ایسته‌میرم. ۶. بئله نيّتیمدن دؤندویوم واختدا نشریّاتدان خبر گلیر.
Post #30814
260