باشیما یاخشی اولمایان بیر ایش گَلَنده، بیرى مَنه حاقسیزلیق ائدَنده، پیس آداملارلا قارشیلاشاندا بونو حاق ائتدیییمی دوشونوردوم. آنامین او سؤزو ایچیمْدَکی قارانلیغی بؤیوْدوب اؤزومدَن بؤیوک ائتدی، ایل‌لَرجَه اَزیلدیم. آمما سونرا...
-آنلادیز کی، پیس آدام اولدوغونو دوشونَن بیرینین خِلاص اولماغا چالیشماسی اؤزونو یاخشی سانانلارین قالدیراغی یۆک دئییل. ائله‌می؟
-هارادان بیلدیز؟ - دَنیز مَنه حیرَتلَه دئییل، ساکیت باخیرْدی.
چونکی عینی‌سینی یاشادیم. ایل‌لَر اؤزونو آناما بَیَندیرمَیَه، اونون گؤزلَرینده‌کی وَحشتی اؤلدوروب اؤزومو یئنی‌دَن اورایا کؤچورمَیَه چالیشدیم.
او سؤزون مَندَه آچدیغی یارانی ساغالتماق اوچون چابالادیقجا، قارشیلاشدیغیم پیسلیکلَری حاق ائتدیییمی دوشوندوکجَه، داها یاخشی بیرى اولماق اوچون بَعضَن اؤزومو اَزدیرْدیم، یا دا ایستَمَه‌دیییم حالدا بیرینَه گولومسَه‌ییردیم.
پَرت اولموشدوم، بیرآندان دینلَه‌ییجی‌دَن دانیشانا چئوریلمیشدیم چونکی.
-اَصلینده، مَن سیزی دینلَه‌مَلی‌یَم، سیز مَنی یوخ، - گولومسَه‌مَیَه چالیشدیم. - -کیمَه‌سَه پیسلیک ائتدیییز اولدومو؟
-بیلمیرَم. مَسئلَه پیسلیک یا یاخشیلیق ائتمَک دئییل. اَن آزین‌دان ایندی. مَنیم تَکلیییم... ایل‌لَرجَه دوستوم اولسون دئیَه کیملیک دَییشدیم، او «پیس» آتامین اولدوغو یانیمی گؤرمَه‌سینلَر دئیَه...
مَثَلَن، حَتا بیلدیییم شئیلَری دَه آنلامایان...
29
مَعصوم بیرى کیمی داوراندیم مَن. ایل‌لَرجَه... آمما هئچ کَس دَه مَنیمْلَه قالمادی. اَوَّل مَنیمْلَه دوست اولماق ایستَیَه‌نلَرین هامیسی بیر مُدّت‌دن سونرا ساکیتجَه چَکیلیب گئتدیلَر.
اوندا «پیسَم» دویغوسو مَنی داها دا اَزدی، «دئمَک کی، معصوم گؤرونمَک ایشَه یارامیر» دئیَه دوشونوب گونلَرجَه اَذییَت چَکدیم.
داها جَلب ائدیجی کیملیک‌لَر آختارماغا باشلادیم. عینَن آنامین گؤزونده یاخشی اولماق ایستَه‌دیییم کیمی...
سونرا بو حیس دَه یوخ اولدو. آنجاق سوسقونلوق قالدی
کئچَن گئجه آتامین اؤلمَه‌یینه کَدَرلَنمه‌یَنده ایچیمدَه‌کی سوسقونلوق دا یوخ اولدو.
-آتانیز اؤلدو؟ - ایندی حیکایه باشقا بیر مَجرايا یؤنَلیردی.
-هَه، کئچَن گئجه. ایندی یاشادیغی اَئودَه‌دیر. بیر آزدان کیمسه‌سیزلر مَزارلیغیندا باسدیرماغا آپاراجاقلار.
اونونلا یاشامیرْدیم، هئچ گؤروشْموردوم دَه. آنام اؤلَندَن سونرا اَئودَن گئتدیم. او بیر قادینلا یاشاماغا باشلادی، سونرا اوندان دا آیریلدی، سونرا داها بیرینْدَن.
هارادانسا تِلِفون نومرَه‌می تاپیب زَنگ وورموشدو، دانیشماق ایستَمَه‌دیم. ایچیمدَه اونا قارشی هئچ نَه یوخدو.
کئچَن گئجه یئنه اوندان زَنگ گَلدی، وُضعیَتی یاخشی دئییلدی. اَوَّل گئتمَک ایستَمَه‌دیم، آمما سونرا...
-نئجه اؤلَه‌جَه‌یینی گؤرمَک ایستَدیز؟
-هَه، هَه، عینَن. گئتدیم، دیواندا اوزانمیشدی. اوزومَه باخدی، مَن دَه دوز اونون گؤزلَرینین ایچینَه باخدیم.
دئییرلَر ها، یالانچیلار قارشی‌سینْداکینین گؤزلَرینَه دوز باخا بیلمَز. یالاندیر. مَنیم آتام تانیدیغیم اَن یالانچی آدامدی، دۆب‌به‌دوز دَه گؤزلَریمین ایچینَه باخاردی. کئچَن گون دَه باخدی. دوز گؤزلَریمَه.
-دَیَردیمی؟ بیزدَه دَه هامیمیزین عائیلَه‌سینْدَه اولانلار اولدو، دَیَردیمی آنانین بوشانماغینا؟ سَنین آنان مُودریک قادین دئییلدی، رئاکسیالاری ساغلام دئییلدی.
اَگَر سَنی سِئوسَیدی، ایندی عائیلَه‌میز واریدی. آنان شُوبْهَه‌لَرینی حَقیقَت کیمی گؤردو. خاصیتَتی عائیلَه حَیاتینا اویغون دئییلدی. بیزدَه‌کینْدَن چوخ اولان عائیله‌لَر وار، ایندی خُوشبَخت یاشاییرلار.
مَن سَس‌سیزجَه اونو دینلَه‌ییردیم. یئنه بَلاغَتلی، نیظاملی دانیشیردی. آنامی گوناهلاندیریردی. هئچ نَه دَییشمَه‌میشدی.
آچیغی، اورایا گئدَنده اونون عُوذر ایستَیَه‌جَیینی، عفْو دیلَیه‌جَیینی ظن ائتمیشدیم. او زامان نئجه حَرَکَت ائدَه‌جَه‌ییمی بیلمیردیم.
اونو باغیشلایاردیم‌می، اونون اوچون اورَه‌ییم یاناردیمی، اونا قارشی مَرحَمَت حیس ائدَردیم‌می؟ یول بویو بونلاری دوشونموشدوم.
او دانیشدیقجا ساکیتلَشدیم، چونکی یئنه عینی آداملا، تانیدیغیم بیرى ایله قارشی-قارشییا اوتورموشدوم.
اونون مَندَن نَسَه ایستَمَه‌سینی آرزولاییرْدیم.
خئیلی سونرا دیللَندی، آغریلارینین آرتدیغینی دئییب ماسانین اوستوندَه‌کی داوا‌نی و سۇیو ایستَه‌دی.
قالخدیم. داوا‌نی، سۇیو گؤتوروب اونا یاخینلاشدیم. او اَلینی اوزاداندا بارداغی اَلیمْدَن یئره بوراخدیم، باشیمی اَییب آیاغیمین یانینْدا یارانمیش گؤلچَه‌یَه اوزون-اوزادی باخدیم.
سونرا داوا‌نی یئره آتیب تاپدادیم.
او آندا ایچیمدَه ییغیلان هَر شئیی اَزدییمی حیس ائتدیم.
Post #30809
351